Miéntras su pareha a keda kondena pa kómplise di arma

WILLEMSTAD.- korte di promé instansia ayera a trata kaso di un pareha akusá pa algun echo  kastigabel.

Ta trata di e akusado rèper Shumayrie Castillo (18)  i tambe su pareha J.Mathew (38).

Castillo ta keda akusá di a kometé  dos atrako, miéntras Mathew ta keda akusá pa poseshon di arma di kandela mas bala.

Segun e promé akusashon di Castillo dia 20 di òktober 2022, huntu ku un otro hòmber nan a atraká un víktima di edat riba karetera.

Nan a bai ku su pòtmòni, telefòn i tambe vários karchinan. Segun e denunsia, e víktima tabata koriendo i a drenta den e hanchi pa bai Klein Hofje, ora ku direpente el a mira un Toyota Vitz shinishi kore pas’e riba velosidat i blòki’e.

Esaki a pone ku e tambe a para su outo i mes ora a mira dos hòmber kara tapá baha fo’i outo kore bin den su direkshon. Un di nan tabatin un arma di kandela di nikel den su man robes. E víktima a bisa ku el a spanta inmensamente. E hòmber ku arma di nikel a kore yega na su banda i bati riba su bentana i a bis’e pa dun’e tur sèn i pertenensia, miéntras e otro hòmber a habri e banda di shofùr hinka man i kue e montante di 275 florin ku e tabatin pone riba e stul. Tambe nan a bis’e pa dun’e su telefòn. El a duna nan tur kos i ora ku nan tabata bai , un di e hòmbernan a saka su yabi fo’i su outo i kore bai kuné. El a pidi nan pa no bai ku e yabi di outo i nan a benta esaki abou.

Polis ku a hasi un investigashon, a tuma nota ku e telefòn ku a keda hòrtá tabata wòrdu uzá. Mes ora polis a sigui e telefòn ku a hiba nan na adrès di e akusado Castillo.

Ora ku polis a yega na e kas, nan a tene un entrada hudisial i a haña un arma di kandela den un baki ros den kamber kaminda Mathew tabata drumí. Tambe polis a haña vários kos hòrtá manera vários telefòn i otro artefaktonan.

Castillo ta keda akusá di a kometé otro atrako dia 11 di novèmber 2022, kaminda nan a atraká un hòmber riba su tereno di kas i bou di menasa ku arma di kandela. Nan a oblig’e duna tur su pertenensianan i tambe telefònnan selular.

Segun e víktima, el a sali Otrabanda i fo’i riba brùg el a tuma nota di un vehíkulo ku tabata persiguié. El a kore drenta su kurá di kas i ora el a wak den spil, el a mira un vehíkulo su tras. Despues dos hòmber deskonosí a baha ku arma den man i oblig’é e pa duna tur pertenensia.

Despues ku polis a detené Castillo, el a deklará ku ta su so a kometé e atrakonan.  Ayera durante tratamentu den sala di korte, el a konta ku e ku e i un tal Jose a kometé e atrakonan. El a fia sèn serka Jose i dor ku e no por a pag’e bèk, Jose a oblig’e pa nan bai kometé atrako. Jose a page 1000 florin pa yud’e tira atrako.

Pa loke ta trata e muhé Mathew e akusado a duna  di konosé ku e no sa nada di arma. Den su promé deklarashon, el a bisa ku e arma tabata di su eks ku a keda asesiná, pero despues el a deklará  ku ta gaña e la gaña  pa yuda Castillo, pero ku e arma ta di Castillo.

El a duna di konosé ku nunka e no a mira niun arma i no sa nada di e arma.

Pa loke ta trata Castillo su situashon personal, wes a bisa ku segun  e rapòrtnan den e dosié, el a lesa ku e hubentut di Castillo tabata hopi duru i tristu. E mes mester a lucha den su bida i purba sobrebibí. Su tata ta sera na Aruba pa kómplise di asesinato aki na Kòrsou.

Dia ku el a keda detené pa e kaso aki e tabatin solamente 17 aña, pero a yega di kasi sera kaba na su edat di 14 aña.

Fiskal a haña e akusashonnan probá i a hasi demanda di 18 luna di kual 6 kondishonal pa Mathew. Mathew tin un karchi kastigu pa lei di opio na dos okashon. Pa loke ta trata Castillo el a keda demanda na  24 luna di kual 6 kondishonal den detenshon hubenil. Wes den su desishon a tene kuenta ku Mathew no ta doño di e arma pero si a mira e arma den su kamber. Wes a desviá for di e demanda i a konden’é na 270 dia di kual 188 kondishonal mas 2 aña di prueba. Pa loke ta trata Castillo wes a konden’é na 24 luna di detenshon hubenil di kual 6 kondishonal.