WILLEMSTAD.- Nos reserva di divisa a keda relativamente stabil den luna di mart 2022. Luna di mart 2022 no a keda atras, ya ku esaki a sera na un nivel relativamente haltu ku a keda hopi serka di 3 miar, igual ku yanüari i febrüari. Den e promé siman di e luna e nivel haltu di nos reserva di divisa a keda konservá na 2.970 miar. Den e promé siman di e luna e reserva a subi di tal forma ku por poko a kibra e barera di 3 miar.

Den di dos siman di luna e reserva a keda registrá na 2.940 miar, ku tambe ta un nivel basta haltu. Esei ta loke por konstatá for di datonan di Banko Sentral.

Den e di tres siman esaki a baha un poko te na 2.927 miar. Pero den e último siman di luna esaki a sigui baha i alkansá 2.918. No opstante tur esaki por konsiderá ku nos reserva di divisa a keda basta stabil i kasi na nivel di 3 miar.

Di akuerdo ku e reservanan ku kual a sera e último añanan kuné: desèmber 2016 a sera na 2.151 miar; desèmber 2017 na 2.380 miar; desèmber 2018 na 2.202 miar; desèmber 2019 na 1.992 miar ku tabata e aña di COVID; desèmber 2020 na 2.663 miar; i desèmber 2021 na 2.943 miar.

Por konkluí ku e reserva di divisa di Kòrsou i St. Maarten na Banko Sentral ta sigui den lift.

Despues di a pasa un periodo den zona di peliger, por bisa ku nos reserva di divisa ta bèk kaminda e mester ta, ku ta sufisiente i denter dje normanan di Banko Sentral ku ta ekivalente na por lo ménos 3 luna di importashon.