“Stòp di keda wak mi pasado”

WILLEMSTAD. - Korte di promé instansia  a trata vários kaso penal den pro forma. Entre nan kaso di e hòmber Gregory P. (28) ku a presentá pa un akto di ladronisia ku e ta keda akusá di dje. Gregory  a bira furioso na momento ku el a tende ku e mester keda será, te desèmber binidero, pa su kaso keda tratá integralmente.

Segun Ministerio Públiko  Gregory  huntu i den union a hasi su mes kulpabel na ladronisia di 2 televishon flatscreen den un bibienda.

El a kometé e akto dor fòrsa bentananan di e kas, drenta i kibra portanan di e kambernan bai ku e televishonnan.

Segun  prosèsverbal, polis a risibí informashon ku tin un vehíkulo moviendo di forma sospechoso den área di e bibienda na Mahuma.

Polisnan ku tabata den e direkshon, a topa ku un vehíkulo ku tabata kuadra ku e deskripshonnan riba karetera.

A kuminsá ku un persekushon, ku a terminá den e área, despues ku shofùr di e vehíkulo a aksidentá den un palu di lus. E momentu ei tantu e shofùr i dos okupante a baha kore bai na pia. Den e vehíkulo polis a topa ku e 2 televishonnan prosedente di e robo na  e bibienda.

Polisnan a konfiská e vehíkulo i tambe e televishonnan. Despues di un investigashon, polis a detené  Gregory komo doño di e vehíkulo. Banda di esaki algun testigu a rekonosé e akusado,  komo un di e hòmbernan ku a baha kore for di e outo.

Durante tratamentu di e kaso, Gregory a indiká ku e no ta responsabel pa e ladronisia. El a bisa ku bèrdat a haña e televishonnan den su outo, pero e mes no tabata tei i no tin nada di aber ku e kaso. P’esei e ke pa lag’é bai su kas.

Su abogado tambe a hasi petishon na wes pa suspendé detenshon di Gregory i lag’é bai kas pendiente tratamentu di su kaso.

Pero fiskal a bisa ku Gregory ta un residivista ku a keda kondená pa arma i algun otro delito den pasado.

Segun fiskal tin sufisiente prueba kontra Gregory den e kaso aki.

Fiskal a pidi pa rechasá e petishon pa suspendé detenshon di akusado. Gregory na su turno a bira furioso i a bisa ku fiskal no mester wak su pasado pero su presente.

El a splika ku últimamente e ta hasi kosnan bon i ta riba e bon kaminda.

Fiskal ta akus’é di ladronisia kaminda e no tabata tei presente. E akusado a pidi wes pa dun’é un chèns pa e bai su kas. Wes den su desishon a rechasá e petishon di e abogado i e akusado. Segun wes tin sufisiente prueba pa mantené e akusado será.