WILLEMSTAD.- E residivista J. Vrutaal (57) ayera a presentá den sala di korte un bia mas pa kasonan di ladronisia.
Segun e akusashon dia 5 mei 2021, e akusado a drenta den kurá di su bisiña i hòrta un tròshi di bakoba na palu di famia Godfried.
Tambe e ta keda akusá pa intento di ladronisia na panaderia Paraguana, dia 2 aprel 2021 te ku 3 aprel 2021.
Aki el a bai ku algun sèn i komestibel.
Dia 28 di febrüari tambe e ta keda akusá di a bai na e mesun panaderia. Riba e dia en kuestion el a bai ku un baki di mansa di Johnny cake, pastechi, belèg i un hèmber ku preimu seku aden.
E víktima di fam Godfried tambe tabata presente den sala ayera.
Komo daño perhuisio el a eksigí 125 florin.
Segun e víktima esaki ta pa su angustia, e dedikashon pa e palu di bakoba i tambe e tempu ku el a inbertí pa kore bai polis i hasi denunsia.
E akusado ku ta será a presentá ayera pa responsabilisá su mes pa su akto. El a bisa ku e ta atmití tur loke nan ta akus’é di dje i ta pidi pa pordon’é.
El a deklará tantu na polis komo ayera na korte, ku el a hòrta e kosnan pasó e tabatin hamber.
E doño di e panaderia a bisa ku el a kibra e slòt, pero Vrutaal a insistí ku esei no ta kuadra.
Pasó e slòt semper tabata habrí, e por a drenta hòrta. Hues tambe a duna di konosé, ku no por a mira riba kámara ku bèrdat e akusado a kibra e slòt.
Tabatin un bia ku polis a mir’é ta zag un hèkwèrk, pero ora polis a yega, el a kore bai.
Durante di e kaso, Godfried a bisa e akusado, ku su mayornan ta penshonado i nan ta tene nan mes bezig ku e palunan.
Si e tabatin mester di algu, e mester a pidi i nan sigur lo no a keda sin dun’é.
El a bisa ku el a bai buska Vrutaal vários bia na kas pa e por a papia kuné, pasó no ta promé bia ku e ta kometé ladronisia na nan kas.
Pero dor ku e no por a hañ’é, el a disidí di bai polis pa hasi denunsia. Godfried a sigui bisa ku Vrutaal no mester pag’é mas, pasó awor el a tende e motibu dikon e ta hòrta. Pero e ke si pa e stòp ku ladronisia i pidi ora e ke algu.
Vrutaal a pidi Godfried pa pordon’é i ku e lo no kometé e akto aki mas.
El a bisa ku e ta kobra 110 florin pa kinsena i mester paga kas 40 florin. Kasi no ta sobra sèn pa e kumpra kuminda. El a atmití ku e ta kumpra droga tambe ku e sèn. Segun Vrutaal e ke yudansa awor si.
Hues a bisa ku na 2015 i 20017 el a haña kastigu di trabou pa komunidat pa ladronisia.
Fo’i aña 1999 el a kai den man di hustisia pa ladronisia.
Reclassering a duna di konosé, ku e mester di un guia intramoral i un tratamentu obligatorio den Brasami.
Pero aworakí e ta riba lista di espera pa bai Brasami. Tambe el a pidi yudansa pa so e tin “liesbreuk” i te ainda e no por wòrdu tratá.
E akusado a splika ku dòkter a bis’é ku e malesa ta hopi avansá i kasi su tripa ta kasi afó.
Segun Vrutaal despues di 7 or tin kasi niun bewaker mas na prizòn i p’esei e tin miedu pa algu pas’é.
Fiskal ta haña e akusashon probá i ta demand’é na 15 luna di kual 9 kondishonal mas 1 aña di tratamentu na Brasami.
Hues na final a yega na e kondena di 12 luna di kual 6 kondishonal mas 1 aña na Brasami.