WILLEMSTAD.- E residivista K. Attaf (27) e siman aki mester a presentá den sala di korte pa su kaso keda tratá.
Pero debí na e situashon di COVID korte a trata e kaso via konferensia di video pro forma.
K. Attaf ku ta bon konosí pa hustisia, aktualmente ta será.
E ta keda akusá pa menasá miembro di su famia ku morto, dor di bis’é “bo sa kuantu kos un hende riba kaya por hasi”.
Tambe e ta keda akusá pa poseshon di 15 mata di mariwana dia 6 di yanüari 2021.
E di 3 akusashon Attaf ta keda akusá di a agredí e víktima di fam Martis ku moketa dia 8 di desèmber 2020.
El a hasi esaki dor di kue Martis den kabei, batié ku moketa den kara, kabes i tambe ku skòp.
Esei a pone ku Martis a kai abou i a sufri leshonnan serio na su kurpa i tabatin basta doló.
Pa loke ta trata e di 4 akusashon Attaf ta keda akusá ku riba e mesun dia el a hòrta un telefòn marka iPhone ku ta pertenesé na Martis.
E di 5 akusashon Attaf ta keda akusá di tabatin 80 mata di mariwana dia 4 di mart 2020 den su poder.
Pa loke ta trata e di 6 akusashon, Attaf ta keda akusá di a menasá 2 otro miembro di su famia ku morto dia 24 di febrüari 2020 dor di usa un machete. El a bisa nan “Mi ta mata bosnan”. “Kap mi ta kap bosnan mata”. “Mi ta mata bo yu". "Bai lihé pa mi no mata bosnan”. “Mata mi ta mata bosnan”.
E di 7 akusashon ku Ministerio Públiko ta akus’é di dje ta, ku dia 6 di òktober 2020 el a menasá e víktima di fam Lucia ku e lo mat’é den e palabranan: "Mata mi ta mata bo”. “Bo no ta skapa mi". “Bo no sa ken mi ta".
E akusado ayera a pidi korte pa dun’é un chèns pa e bai kas, wardando tratamentu di e kaso.
Fiskal no a oponé su mes kontra pa suspendé e detenshon.
Hues den su desishon a bisa ku e akusado a haña hopi chèns den vários kasonan anterior, pero ora e sali e ta bolbe hasi mes kos.
Esaki ta pone ku hues ta rechasá e petishon.
E kaso lo keda tratá dia 26 di mei binidero.