WILLEMSTAD.- E hòmber L.A. (43) no a presentá dilanti hues, pa responsabilisá su mes pa su akto. Apesar di esaki su kaso a keda tratá tòg, den su ousensia.

Ministerio Públiko ta akusá L.J. di a trata na eksportá un kantidat di  852 gram di koka den su maleta pa Hulanda.

Segun e akusashon, riba e dia ei outoridatnan konserní a tuma nota ku e akusado tabata aktua basta nèrvioso.

Duana ku a kontrolá su maleta mas profundo, a tuma nota ku e maleta  tabata mas pisá ku normal.

Ora ku a listra e maleta, e personal a tuma nota ku e maleta su interior tabata basta di kònkel. A resultá ku e maleta tabata yená ku koka na pasta.

E akusado a deklará, ku e tabata para den un bar, ora ku un hòmber deskonosí pe a aserk’é i kuminsá kombersá kuné. Den kombersashon, e hòmber a puntr’é si e ke transportá droga pe i gana poko sèn.

E akusado a deklará na polis, mirando ku e tabatin nesesidat di sèn, el a bai di akuerdo ku e oferta sin pensa.

Fiskal a bisa ku e kantidat ku e akusado kier a transportá, lei ta stipulá un kastigu di 24 luna di prizòn inkondishonal.

Fiskal a lamentá ku e  akusado no a presentá den sala, pa responsabilisá su mes pa su akto i mustra interes.

Fiskal a duna di konosé, ku ta trata aki di un residivista ku no muchu tempu pasa tambe a kai pa lei di opio na Hulanda.  Mirando esaki, fiskal ta hasi demanda di 24 luna, kitando aresto preventivo.

Hues no a mira motibu pa desviá i ta bai di akuerdo ku e demanda.