WILLEMSTAD.- E residivista Farley Diels (51) a keda kondená na un kastigu di 36 luna pa trafikashon di droga.

Diels a kai den man di hustisia for di aña 1996  te ku 2016 na vários okashon pa  entre otro arma kandela, atrako armá i droga. Fiskal a konta ku Diels a sinta na tur 10 aña di kastigu. E tabata kai será bèk manera e sali fo’i prizòn.

E bia aki Ministerio Públiko ta akus’é un bia mas pa trafikashon di droga. Segun e akusashon, Diels a trata na eksportá 16 kilo mas 420 gram di koka.

El a hasi esaki den muebles via un kompania di manda karga afó dia 2 di yüni último.

E akusado ku ta será a presentá ayera den sala pa responsabilisá su mes pa su akto. El a splika ku e no tin nada di aber ku e kaso. Segun e akusado e tabatin relashon amoroso ku un dama ku yama Jenny pa 8 luna. Nan tabatin plan pa bai biba Hulanda i kier a bai ku nan muebelnan.  El a sigui konta ku Jenny a dun’é sèn pa bai hiba e muebelnan  e kompania di karga pa manda Hulanda.

Despues Jenny a tuma su pasport pe “ book” su ticket pe.

Segun e akusado, despues di 3 luna polis ta bin busk’é na kas pasó den e muebelnan ku el a pòst tabatin droga aden. El a bisa ayera ku e no tabata sa mes di loke nan ta akus’é. Segun e akusado, el a duna e polisnan number di Jenny, adrès i tambe plachi number di outo. Hues a bisa ku polisnan a hasi investigashon, pero nunka a yega na Jenny. E adrès ku e  akusado a duna di Jenny, e plachi number  di outo i e number di telefòn  no ta eksistí.  Segun Diels e tampoko a tende di Jenny mas i p’esei no por kulp’é di algu ku e no sa di dje.

Si nan ke sa algu mester buska Jenny pa para responsabel. Hues  a sigui bisa ku na polis mama di e akusado a bisa ku nunka e no a tende di Jenny. E akusado a bisa ku esei no ta kuadra. E ta kere ku su mama no gusta Jenny, p’esei e lo ta bisa asina.

Fiskal Niks a bisa den su rekisitorio, ku a haña 42 pakete di koka den e muebelnan. Apesar ku no tabatin rapòrt di ADC pa konfirmá ku ta trata di koka, e ta bai tras di e tèstnan ku duana a hasi na Hato di e supstansia ku a duna kokaina komo resultado.

Segun fiskal, a haña puiru na blòki den e muebelnan ku tabatin holó basta fuerte.

Na polis Diels no a duna masha informashon kon pa lokalisá Jenny.

Fiskal a bisa ku e karchi kastigu di Diels ta basta amplio i por mira ku Diels kada 2 aña tabata kai será pa entre otro lei di opio.

P’esei e ta tum’é hopi na malu, pasó si ta manera e ta bisa ku e no tabata sa ku ta droga tabatin den e muebelnan, e lo mester a bai mas kouteloso pa pòst kos pa hende.

Mirando tur esakinan fiskal a yega na un demanda di 48 luna inkondishonal pa Diels. Hues Snitker den su desishon a desviá for di e demanda di fiskal i a kondená e akusado na 36 luna di prizòn.