WILLEMSTAD – Un deskubrimentu makabro a tuma lugá awe den bario di Las Almas, kaminda a topa restonan humano derá den kura di un kas ku tabata pará bashí pa basta tempu kaba.

E deskubrimentu a tuma lugá ora e doño di e kas a disidí di bai wak su propiedat, ku tabata den estado di abandono i ku su kura tabata yen di yerba i mata. Durante trabounan di limpiesa den e kura, nan a ripará ku un pia tabata sali for di un buraku ku tabata tapá ku un pida palu.

Ora nan a kita e pida palu, nan a deskubrí wesunan di pia humano. Mesora nan a bati alarma i a informá polis di e situashon.

Un patruya di polis a presentá na e sitio i, despues di evaluá e situashon, a pidi asistensia di patólogo i personal di Tim Forensiko di Opsporing (TFO) pa realisá un investigashon mas profundo.

Durante e investigashon, a kuminsá koba den e buraku, kaminda a deskubrí mas restonan humano. A base di e kabei largu, e tamaño di kabes i e struktura di e kurpa, ta sospechá ku e restonan ta pertenesé na un muhé di edat avansá. Sinembargo, te na e momentu aki no tin konfirmashon ofisial tokante identidat di e persona.

Segun informashon preliminar, anteriormente un pareha aleman tabata biba den e kas en kuestion. Aparentemente e pareha a desaparesé di un dia pa otro, i desde e tempu ei e kas a keda bandoná.

Fiskal tambe a presentá na e sitio pa sigui e investigashon. Ta den plan pa habri e kas i investigá su interior pa determiná si tin mas indikashon ku por yuda aklará e kaso.

Te na e momentu aki no ta konosí e identidat di e persona, ni e sirkunstansianan ku a kondusí na su fayesimentu. Polis ta sigui ku e investigashon.

Mas hende morto

Polis ta informá ku kontinuando ku e investigashon den e kaso di e skelèt ku a topa den kurá di un kas na Las Almas polis a logra habri e kas.

Den e kas a bin topa kurpa di un hòmber riba kama den un kamber di e kas.

E kurpa aki no tabata un skelèt pero ya tin algun tempu kaba morto.

Den kuadro di investigashon, e kurpa aki tambe a keda konfiská.