WILLEMSTAD.- Ayera Asosashon di Restorantnan di Kòrsou (CRA) a tene un enkuentro ku otro despues di e situashon di pandemia ku pais tabata den. Na e okashon aki e presidente di CRA, sr. Zeno Circkens a duna di konosé ku nan a sobreviví e pandemia, pero ainda tin reto.

El a bisa ku nan tabatin un aña difísil tras di lomba. Nan no a sali kompletamente for di e situashon i ainda tin reto. E sektor aki a keda afektá gravemente. Lástimamente algun kolega den e mundu di restorant i horeca no por a salba i nan a sera nan porta. E ta hopi fèrfelu ora un restorant sera, pasombra tur hende den sektor di horeca, ta un famia. Ora ku sera un restorant i manda hende kas, e ta dal tur hende.

CRA ta un organisashon ku a haña rekonosementu pasobra gobièrnu a skucha nan. Nan sektor ta importante komo dunadó di trabou, i tin mas di 7000 trahadó.

E periodo di pandemia pisa ku nos a pasa den pa restorantnan tabata un periodo pisa, pero nan a sobreviví i nan mester ta kontentu p’esei.

Ku bon kolaborashon ku MEO i e tim di krísis, diariamente CRA tabatin kontakto ku nan riba nan preokupashon i haña informashon. CRA tambe a haña chèns di pensa riba solushon i nan ta gradesido na MEO p’e oportunidat. Hopi kos mester sosodé i tin hopi trabou pa hasi ainda. sr. Circkens a pidi su miembronan pa keda kritiko i ta tene e direktiva di CRA skèrpi.

Sra. minister Ruthmilda Larmonie-Cecilia remplasando e ministerio di MEO a bisa ku Kòrsou bo tin di sintié. Si no konosé Kòrsou no por haña un bon merkadeo ku ta próspero pa hasi negoshi. P’esei e lo hiba su diskurso na papiamentu. E ta mira distansia entre e yu’i Kòrsou i e hulandes oropeo ku ta hasi negoshi na Kòrsou. Tin hopi trabou pa dilanti. Meskos ku komunidat, e restorantnan tambe a sufri den pandemia. Awor aki tin di kuminsá “built up”.

“Manera CRA a bisa ku trabou duru ta warda nos, pero pa tin éksito mester hasié huntu. Gobièrnu mester di sektor priva i sektor priva mester di gobièrnu pa kaminda ta nesesario”.

Komo minister di MEO, i SOAW el a kai huntu, paso SOAW no por sin MEO i nan tin di komplementá otro. I awor ku e tin e dos pèchinan, dikon mihó momentu pa duna kontenido i bisa e direkshon ku ke bai. E ta traha hopi pragmátiko, solushoná problema. Minister a pidi miembronan di CRA pa bai p’e reto. Tin kasi 14 mil hende sin trabou ku ta risibí yudansa sosial i nan mester bai trabou bek, pa sòru pa nan i nan famia. Ta huntu mester hasié. Kòrsou tin di habri bèk, i lanta para mas fuerte unda nos tabata, sra. Larmonie-Cecilia a terminá bisando.