WILLEMSTAD.-E asosiashon di restorantnan di Kòrsou ta bati na porta di gobièrnu un bia mas ku e petishon pa sigui suavisá medidanan den kuadro di Covid-19. Na opinion di e organisashon e último konferensia di prensa den kua a anunsiá suavisashon di medidanan tabata 4 di yüni pues sigur tres siman pasá. Mirando ku e kantidat di turistanan ta oumentando e asosiashon ta hasi apelashon na gobernantenan pa bini ku mas suavisashon di manera ku e sektor di restorantnan por permití mas kliente i asina trata na rekuperá e pèrdida grandi ku nan a sufri durante di e pandemia.

Te ainda restorantnan por tuma solamente 50% di nan kapasidat, miéntras ku no ta permití pa klientenan sinta na bar. Personal mester bisti tapaboka. Tur esakinan ta stroba e sektor di produsí mas entrada. E asosiashon a aserka e diferente ministerionan ku e petishon pa mas suavisashon, pero no ta hañando oido.  Restorantnan ke bai bek na 100% kapasidat!

Nan ta lamentá ku ta lubidá e sektor aki. Ta trata di hopi kupo di trabou ku a bai pèrdí durante di Corona i esaki ta e oportunidat pa laga e sektor rebibá atrobe. Temporada haltu ta yegando i esei ta e momentu pa krea kuponan di trabou nobo, pero pa esaki mester logra mas suavisashon di medidanan anti Covid.  (file foto)