Asosashon di Empresarionan Chikí: Toke de keda for di 9 or ta funesto

WILLEMSTAD. - Hopi hende ta konsiente ku presensia di COVID-19 ta pone ku mester frena e desaroyo di infekshon aki na Kòrsou. Pero tin sierto sektornan empresarial ku simplemente no por wanta niun  sla mas i un di e sektornan ei ta e restorantnan ku ya tin e hopi difísil. Netamente e sektor ku a kumpli ku tur eksigensia, manera registrashon, limitá na mesanan, sòru pa limpiesa, pues tur loke ku mester a sòru pa nan por brinda servio ku ta kumpli ku e eksigensianan, ta e promé sektor ku ta haña sla ku e medidanan ku resientemente a keda introdusí.

Esaki ta motibu ku e Asosashon di Empresarionan Chikí Kòrsou (ADECK) ta reuniendo pa buska solushon pa e sektor aki, despues ku vários di e restorantnan a aserká nan.

Den komentario pa redakshon di EXTRA, sra. Bionda Fonseca a duna di konosé ku e medidanan aki tin un impakto grandi i e empresarionan no por sali fásilmente afó.

Esaki ta pone ku nan mester aserka e bankonan pa buska un forma kon por yuda e sektor aki, esta bin ku un moratorio pa sikiera e restorantnan.

Na opinion di Fonseca t’asina ku e orario di e toke de keda tin su efektonan funesto pa restorant kompará ku otro sektor ku defakto si por keda funshoná normal.

Hopi di e restorantnan ya e invertí pa pasa e periodo benidero i awor tin di  sera for di 8 or di anochi.

E toke de keda ta pa trese siman, pero e sektor aki no por sobrebibí sera tres siman for di 8 or.

Segun Fonseca, mirando e efekto di e toke de keda, hopi di e restorantnan aki no tin chèns pa sobrebibí i ku lamentablemente lo mester sera nan negoshi.

Esaki ta motibu ku e siman benidero e asosashon ta hasi un yamada na tur esnan perhudiká, pa huntu aserka bankonan pa un periodo di moratorio.

Simplemente no por antisipá kon leu e efektonan lo ta, pero sigur e lo ta funesto.

Pa aserka ADECK ta via di Facebook ta e kanal ku por i asina keda informá pa e desaroyonan.

Fonseca a splika horeka, restorantnan i trùk di pan no por dil ku e impakto aki ta pidiendo ousilio.

Fonseca ta hasi un yamada na tur ku ta keda perhudiká p’asina huntu por logra sobrebibí.

Finalmente Fonseca a splika ku ainda e asosashon ta profilá bou di e nòmber di ADECK, pero pa 2021 e asosashon ta den un bachi nobo i mas agresivo.