WILLEMSTAD.- Djadumingu 7 di desèmber 2025 den oranan di atardi e kontròlnan enkonekshon ku e akshon ‘Fin di aña sin zanzaña’ tabata dirigí riba poseshon ilegal di arma i droga, pero tambe violashon di lei di tráfiko.
A tene kòntròl di tráfiko riba Caracasbaaiweg, a kontrolá 71 vehíkulo i a repartí 29 prosèsverbal pa manehá vehíkulo sin reibeweis bálido, sin seguro bálido i manehá un vehíkulo ku glas skur.
E kontròlnan a kontinua den barionan di Otrobanda, Sta. Helena i Buena Vista. Mas lat den área di Otrobanda a detené un hòmber sospechoso di kual tabatin búskeda di dje den un kaso di tiramentu. Durante di e kontròl a haña i konfiská kuchú i mariwana.
Riba Mirla Plateweg a hasi detenshon di un hòmber di nashonalidat Hamaikino ku no tabata den poseshon di ningun dokumento. A deten’é na e sitio i a entreg’é na Departamentu di Imigrashon ku lo sòru pa su deportashon.