WILLEMSTAD. -Informashon ku EXTRA ta dispone di dje ta indiká ku a surgi un situashon basta serio den hospital, Curaçao Medical Center (CMC). Ta asina ku un grupo di trahadó di seguridat a haña tende ku fin di yüni aki nan ta haña retiro. Nan kontrakt lo finalisá fin di yüli, pero pa motibunan di seguridat ta paga nan te ku fin di yüli pero for di awor no ta permití pa nan subi tereno di CMC mas. E sindikato di enfermeria CBV ta na altura pero debí na e orario e dirigentenan no tabata kontestá telefòn mas.

EXTRA por informá ku tur frankesa ku e kaso di retiro di e grupo di trahadó aki a pone ku den direktiva di e sindikato por lo ménos 3 miembro ta kuestioná e trankilidat ku sobrá di e direktiva ta aseptá e loke gerensia di CMC ta hasiendo ku e grupo di trahadó aki.

Buskando informashon mas ayá EXTRA a komprondé di un miembro sindikal ku e instituto, algun tempu pasá a buska un grupo di 8 trahadó pa traha den e departamento di seguridat. A resultá ku ni e trahadónan ni e hefe no sa nada di seguridat. Algun dirigente sindikal a kuestioná e punto aki, pero gerensia di CMC lo a indiká ku e trahadónan mester por komuniká bon i no nesesariamente nan mester konosé detayenan di seguridat. Sindikato a pidi pa duna training di seguridat i tambe komunikashon na e grupo. Na dos okashon a laga e bosero di komunikashon duna algun tep na e grupo di trahadó. Resientemente a buska un penshonado den seguridat di un banko grandi di fam T. pa e train e hendenan. E instituto a presentá e idea pa hiba un kombersashon di evaluashon ku e Trahadónan. Algun sindikalista no a konfia e asuntu. E kombersashon a resultá un evaluashon i apesar di a hasi palabrashon delantá ku gerensia a resultá ku gerensia a kambia desishon i duna retiro na gran parti di e grupo. Den CBV e asuntu aki ta motibu di hopi malkontentu.