Frakshon MAN-PIN:

WILLEMSTAD.– Frakshon MAN-PIN den un karta dirigí na minister di Finansa, Javier Silvania, ta ekspresá su preokupashon grandi si gobièrnu lo entregá e relato preliminar i modifikashon di presupuesto pa 2024 den e término legal stipulá. Segun e ordenansa di lei kontabilidat 2010, mester a entregá e dokumentonan aki na parlamento pa lo ménos pa 15 di mei di e aña siguiente.

Frakshon MAN-PIN ta konsiderá no kumplimentu ku loke lei finansiero ta stipulá komo un falta grave ku e prinsipio di transparensia i kontròl parlamentario riba finansa públiko di pais. Den e kuadro aki e frakshon ta eksigí klaridat di parti di e minister riba un kantidat di punto ku e ta konsiderá importante.

MAN-PIN ke sa si Silvania por konfirmá si e relato preliminar i eventual modifikashon di presupuesto riba aña 2024 ta kla i ki motibu tin ku no a entregá e dokumentunan aki na parlamento pa 15di mei 2025, manera lei ta eksigí. Tambe ke sa ki fecha minister ta planiá pa entregá e dokumentunan aki na Parlamento.

Mas aleu e frakshon ta puntra kiko minister ta tuma komo medida pa prevení ku e tipo di retraso aki ripití den futuro. “Esaki ta e promé biaha ku no ta respetá e término legal? Si no, por duna un lista di ku e biahanan anterior?”

Finalmente frakshon di MAN-PIN ke sa si a konsultá College Financieel Toezicht (Cft) riba e situashon aktual i si ta asina, na kua palabrashon a yega. E frakshon ta suprayá ku maneho finansiero públiko di pais mester ta suheto na un proseso manera lei ta stipulá esta, kla, íntegro i transparente. “Kualkier desviashon di e regulashon legal ta menasa e konfiansa ku pueblo mester tin den gobernashon.”

Foto:

...Suzy Camelia-Römer...