WILLEMSTAD.- Na e momentonan aki, Curgas i Curoil Bonaire ta enkontrando un retraso den entrega di gas di 100 lbs na klientenan doméstiko.
Aktualmente, un total di mas òf ménos 250 kliente na Kòrsou i 350 kliente na Boneiru, ta wardando mas ku 2 siman pa risibí nan gas. E motibu prinsipal pa e retraso ta e kantidat relativamente grandi di silindernan di 100 lbs ku mester keda remplasá.
Durante aña, na momento ku Curgas/Curoil Bonaire a rekohé silinder di gas na kas di e kliente, Curgas/Curoil Bonaire ta kontrolá e silinder, hasi “druktest”, pa garantisá ku silindernan ta den bon kondishon. Silindernan ku no ta den bon kondishon, ta pasa den un proseso di reparashon òf ta keda deskualifiká i remplasá ku silindernan nobo. Último lunanan, Curgas/Curoil Bonaire ta rekogiendo un kantidat konsiderabel di silindernan ku ya no ta den bon kondishon i tin ku keda remplasá pa silindernan nobo.
Lamentablemente e kònteiner ku mester a yega ku e silindernan nobo, tabatin un retraso ku konsekuensia ku no tabata tin sufisiente silinder pa hinka bèk den rotashon. Esaki a trese kuné un retraso den distribushon na ámbos isla.
Pa remediá e situashon akí, e tim di operashon ta trahando orarionan èkstra den siman i den wikèntnan binidero, pa por kumpli ku klientenan ku tin mas ku 2 siman wardando riba gas. Curoil ta premirá ku denter di 2 pa 3 siman, e situashon akí lo normalisá tantu na Kòrsou komo na Boneiru. Curoil ta pidi su diskulpa pa kualke inkumbiniensia ku esaki por a trese kuné.