Miembronan kontemplando pa buska konseho hurídiko

WILLEMSTAD.- Direktiva di Partido Nashonal di Pueblo (PNP) a prek e fecha di 4 di mei pa tene un reunion general pa miembresia. Esaki konforme un karta fechá 16 di febrüari 2026 firmá pa 28 miembro pidiendo un reunion pa asina por haña aklarashon riba preguntanan ku nan tin. Den e karta a pidi pa yama e reunion den 2 siman di tempu manera statutonan di partido ta indiká, pero ta yama e reunion pues despues di mas ku 2 luna i mei.

Motibu ku a pidi e reunion ta debí ku, despues di a eligí un direktiva nobo na òktober 2024, no a yama reunion general mas. Esaki miéntras ku konforme statutonan mester yama 4 reunion general pa aña di kua 1 ta e kongreso di partido. Pues miembronan no tin informashon kiko ta pasando ku partido i no ta haña responsabilisashon finansiero tampoko di parti direktiva.

Ta bin aserka ku ta den prensa ta tuma nota ku lider polítiko Ruthmilda Larmonie-Cecilia a pone su puesto na disposishon di partido i ku entre otro sekretario general i tesorero di partido a entregá nan retiro. Ofisialmente no a tende nada di esakinan den partido. Riba e agènda ku a traha pa e reunion general di 4 di mei awor a pone puntonan manera relato i kuentanan anual di partido, relato di komishon di kaha i aprobashon di e kuenta anual, evaluashon di funshonamentu di partido i elekshon pa miembronan nobo di direktiva.

E punto di elekshon pa miembronan nobo di direktiva ta lanta otro interogatorio. Aki tambe statutonan ta deskribí kon e proseso pa elekshon di miembro di direktiva tin ku kana. Un di e kondishonnan ta ku kandidatonan mester buska firma pa sostené nan kandidatura promé ku nan por pone nan mes eligibel.

Pues, apesar ku a yama e reunion, e situashon no ta sinta bon bou di miembronan.

Regla

Miembronan tin hopi interogatorio riba kon kosnan ta kanando den partido i ta kontemplá pa buska guia hurídiko pa yuda nan den kon pa atendé ku e situashon. Na promé lugá tin informashon ku sigur 4 miembro di e direktiva a tuma retiro, dia kua 2 ta miembronan di e direktiva diario. Esaki ta nifiká ku konforme statutonan ku e direktiva diario ta lam, no tin derecho di eksistensia i konsekuentemente no por tuma desishon.

Konforme statuto e direktiva kompletu mester konsistí di por lo mínimo 7 miembro. Na òktober 2024 a eligí 9 miembro nobo den direktiva i si entretantu 4 a tuma retiro ta 5 miembro so a sobra loke no ta kumpli ku eksigensianan statutario. Ta a base di esaki miembronan ta kuestioná ta kua direktiva a yama e reunion general di dia 4 di mei awor.

Un konvokashon pa un reunion general mester ta firmá pa presidente i sekretario di partido. Riba e konvokashon ku a sali esaki no ta e kaso. Bou di e konvokashon tin skibí ‘direktiva’. “Kua direktiva?”, ta komentario ku EXTRA a haña.

Meskos ta konta pa e karta ku a kompañá e konvokashon i ku ta informá ku ta bai yama un reunion general pa atendé ku preokupashonnan ku ta biba. Ounke ku no por a kumpli ku e petishon pa yama e reunion den dos siman di tempu ta hasiendo preparashonnan pa kumpli ku e agènda di reunion i duna tur informashon, ta bisa den e karta. E karta no ta firmá, pero bou di e karta tin simplemente skibí ‘direktiva’.

Ta entre otro pa e motibunan aki ku miembronan ta kontemplá pa buska asistensia hurídiko pa wak kon tin ku atendé ku e situashon aki.

Rèspèt

Por último miembronan ta rabiá ku reakshon den prensa di algun parlamentario, despues ku a bira públikamente konosí ku partido tin mas ku 1 aña sin ta yama reunion general i ku un grupo di mas ku 25 miembro konforme statuto a pidi un reunion pa haña informashon di kiko ta pasando. “A bisa ku ta hendenan ku tin gana di kos ta reklamá. Tambe a bisa ku esnan ku ta reklamá mester bai.”

E ekspreshonnan aki a kai den hopi mal tera serka e miembronan ku ta haña esakinan un falta di rèspèt. Nan ta haña ku nan no a hasi nada robes. Tampoko nan no a pidi pa haña kos. Úniko ku a pidi ta un reunion pa komo miembronan ku ta paga kontribushon haña informashon.