WILLEMSTAD.- Minister di Finansa, Javier Silvania dia 24 di sèptèmber awor ta bèk den parlamento pa un biaha mas respondé preguntanan di parlamento riba su desishon pa na komienso di 2023 duna eksonerashon di debe di impuesto na rason di 3 miar florin. Tabata frakshonnan di MAN i PAR ku a pidi e reunion ku karakter di urgensia.

Un reunion di Komishon Sentral riba e tópiko aki ku a kuminsá na mart 2023 a kontinuá te 19 ougùstùs 2024 kaminda Silvania a kontestá preguntanan ku a hasi su persona 1 aña i 5 luna promé. Parlamento no a keda satisfecho ku e kontestanan risibí. Frakshon di MAN entretantu a pidi minister pa manda tur dokumento relevante manera konsehonan di diferente departamento riba e desishon pa duna eksonerashon pa parlamento promé ku reunion di 24 sèptèmber kuminsá.

Manera EXTRA a informá for di ayera tin preguntanan klave ku e parlamentarionan ke haña kontesta riba dje ta: si den e desishon pa duna eksonerashon di tur debe di impuesto di 2017 i promé tabatin intervenshon pa yuda un komersiante spesífiko ku tabata debe 18 mion florin na impuesto. Tambe ke sa si a neglishá e kondishonnan ku Konseho di Minister a mara na su desishon di 24 ougùstùs 2022 pa no kobra sierto debe di impuesto mas i si minister di Finansa a duna un instrukshon ku ta surpasá su outoridat. Alabes tin interogatorio si a kometé falsifikashon di dokumento den e proseso pa toma di desishon.

Ta for di 2022 e departamento di maneho di presupuesto di Ministerio di Finansa a presentá ku un dokumento pa limpia registronan di servisio di impuesto (“opschoning invoderingsbestand Belastingdienst Curaçao”) ku e number di dokumento: 2022/018846. Huntu ku e dokumento aki tabatin alabes konseho di direktorado di asuntunan fiskal i un dokumento mas trahá pa un kolaboradó di minister di Finansa i huntu tur a bai pa e tim di sosten di ministerio di Finansa pa un reakshon.

Dia 24 ougùstùs 2022 Konseho di Minister ta bai di akuerdo ku e proposishon pa limpia registronan di servisio di impuesto inkluso e konseho di direktorado pa asuntunan fiskal bou di e number di dokumento 2022/018846. E proposishon pues no ta un maneho skibí pa  servisio di impuesto, pero pa un komishon ku konseheronan apuntá pa minister di Finansa.

Gobièrnu di Kòrsou a aprobá e proposishon bou di 3 kondishon. Esta, ku no ta kobra debenan di impuesto (“aanslagen”) ku a pasa fecha (“verjaar”), ku ta laga servisio di impuesto traha un maneho pa bou di sierto kondishon no kobra debe di impuesto ku un fecha (“dagtekening”) ku ta mas ku 5 aña bieu i ku pa un solo biaha no ta kobra debenan di impuesto te na un máksimo di 2.500 florin ku tin un fecha di entre 1 i 5 aña bieu.

A base di e desishon aki Ontvanger ta risibí un karta fechá 5 desèmber 2022 pa un konsehero di gabinete di minister di Finansa tambe forma parti di e komishon pa traha e maneho pa limpia registronan di servisio di impuesto. A base di e maneho ku a traha aki, ku lo no a trese konfushon den su implementashon i ku a haña number di dokumento 2022/04109, a yega na un suma di 1,2 miar florin na debe di impuesto ku lo no kobra mas den e limpiesa di registronan.

Den e maneho aki ku ta karga pues aprobashon di Ontvanger a tene kuenta tambe ku tur tipo di kondishon fiskal ora ta hasi e tipo di ehersisionan aki. Den un reunion di 17 yanüari 2023 sinembargo, a duna instrukshon direkto pa kambia e maneho i pa no kobra niun debe di impuesto di 2017 i mas bieu i pa ehekutá e instrukshon aki mesora. Pues no ta wak fecha (“dagtekening”) mas di un debe di impuesto (“aanslag”) sino e periodo di 2017 i mas promé. Den e reunion aki tabatin entre otro konsehero di minister, representantenan di SBAB, representante di un komersiante i kolaboradó di Ontvanger presente.

E instrukshon aki, fechá 23 yanüari 2023 ta haña number di dokumento 2023/008009. E ta representá un suma total di mas ku 3,1 mion florin ku lo no kobra mas na debe di impuesto ku ta 2 miar florin mas tantu ku e maneho ku a skibi a base di e desishon di Konseho di Minister.

Pregunta ku frakshonnan tin, ta si minister di Finansa a bai bèk den Konseho di Minister ku e dokumento numerá 2022/04109 ku ta e maneho ku servisio di impuesto a skibi i e dokumento numerá 2023/008009 ku ta e desishon pa no kobra debe di impuesto di 2017 i mas bieu pa un suma total di mas ku 3,1 miar florin.

Tambe ke sa a base di kua number di dokumento a tuma e desishon pa no kobra mas ku 3,1 miar florin na impuesto esta e number di dokumento 2022/04109 òf number di dokumento 2023/008009.

Foto:

...Javier Silvania...