Sindikatonan atrobe no ta haña kontesta

WILLEMSTAD.- E reunion regular di e órgano di konsulta entre gobièrnu i sindikatonan, GOA pa haña kontesta riba kantidat di tópiko ku ta pendiente manera revokashon di lei di 12,5 porshento, pago di debe na “loontrede” i 3 porshento lumpsum 2020 i algun otro puntonan mas, no ta sigui. E reunion tabata planiá pa tuma lugá djaweps 19 yüli.

Pa 2 luna kaba minister di Maneho di Gobernashon, Planifikashon i Servisio Públiko, Ornelio ‘Kid’ Martina no por kumpli ku su promesa pa duna e sindikatonan kontesta. Tambe ta asina ku gobièrnu no ta kontestá petishon di sindikatonan pa un reunion ku Konseho di Minister den su totalidat pa asina atendé ku tópikonan ku ta konserní otro ministernan tambe.

Den reunion di 16 mei minister Martina a primintí e sindikatonan despues di un luna, esta den reunion di 20 yüni e lo bini ku kontesta riba nan preguntanan. Pero den un reunion ekstraordinario di 17 yüni e minister a bisa ku e no tin kontesta ainda pa e sindikatonan i a para e reunion di 20 yüni bisando ku den e reunion regular di 19 yüli lo presentá ku e kontestanan.

Loke si e minister a indiká na e sindikatonan dia 17 yüni ta, ku tin mas òf ménos mitar di e sèn pa paga e debe di “loontrede” i 3 porshento lumpsum 2020 i ku mester wak kon ta sera e sobrá di e sèn. E pago segun promesa di Martina lo tuma lugá mas tardá desèmber 2024.

Siman pasá e 5 sindikatonan ABVO, Sitek, NAPB STrAF i SAP a bolbe reuní riba e echo ku kosnan no ta kanando, esta ku no ta haña kontesta di gobièrnu. Despues di e reunion di 17 yüni a manda un rekordatorio (“rappelbrief”) pa Konseho di Minister relashoná ku e oudiensia ku sindikatonan a pidi for di 17 mei.

Den e karta e sindikatonan ta bisa di ta preokupá ku diferente tópiko ku ta hunga den seno di gobièrnu i CCvV ku no ta kaba di atendé pa kaba. E sindikatonan ke un reunion mas pronto ku ta posibel ku gobièrnu riba e puntonan aki.

Entretantu tin 2 luna ku a pasa sin ku gobièrnu a reakshoná riba e petishon di e sindikatonan. E karta di 17 mei ta menshoná 6 tópiko spesífiko ku e sindikatonan ke deliberá riba dje.

Na promé lugá ta bai pa revoká e lei di 2020 pa kòrta den kondishon laboral di ámtenarnan ku 12,5 porshento. Amtenarnan a haña nan dianan di fakansi i plaka di fakansi bèk, pero mester pasa un kambio di lei den parlamento pa revoká e otro medidanan di indeksashon i “loontrede” ku ta di fris.

Sindikatonan ta mustra ku pa ministernan i miembronan di parlamento si a eliminá e 12,5 porshento ku tabata kòrta den nan kondishonnan laboral kaba, pero ainda no por kumpli ku ámtenarnan. E disputa entre sindikatonan i gobièrnu ta ku gobièrnu ke eliminá e medidanan entrante 1 yanüari 2024 miéntras ku sindikatonan ke hasi esaki ku forsa retroaktivo te 1 yanüari 2021.

Otro punto ku sindikatonan ke diskutí riba dje ta pago di e debe di “loontrede” i 3 porshento lumpsum 2020. Ta trata di un debe ku gobièrnu a rekonosé. Na desèmber 2023 a paga indeksashon di salario 2019 i 2020 pero falta pago ainda di “loontrede” i lumpsum.

Mas di e puntonan di preokupashon ta kambio di e lei di penshun. E kambio ta nesesario pa hasi posibel ku ta penshonadonan por haña indeksashon di nan penshun sin ku ta mara esaki na e kondishon ku ámtenarnan tambe mester tin derechi riba indeksashon di salario i basta ku e grado di kobertura di fondo di penshun, APC ta permití.

Alabes e sindikatonan ke tende ki dia minister di Finansa ta presentá den GOA pa duna informashon riba realisashon di e organisashon nobo di servisio di impuesto (Nieuwe Belastingdienst). Riba e proseso di solisitut den kuerpo polisial e sindikatonan ke tende ki dia minister di Hustisia, Shalten Hato lo duna un presentashon den reunion di GOA.

Finalmente e sindikatonan ke sa ki dia ta risibí e dokumentonan relevante relashoná ku un areglo pa ora un ámtenar kumpli 45 aña den servisio.

Foto:

...For di 14 mei e 5 sindikatonan ku ta representá den komishon sentral di sindikatonan a reuní debí na malkontentu ku te reina pasobra no tin progreso den niun di e asuntunan ku ta atendé den seno di GOA...