Parlamento a yama reunion pa atendé polémika Silvania-Trona pa otro siman

WILLEMSTAD.- Awe mainta a tuma lugá e reunion solèm di parlamentu pa selebrashon dia di outonomia 10-10-10. Loke a hala nos atenshon ta e ousensia di minister Silvania den e reunion.

I mei mei di e kantidat di spekulashon pa ku posishon di Minister Silvania, nada ofisial a keda deklará te na e momentunan aki. Lokual si EXTRA por konfirmá ta ku ofisina di komunikashon di Parlamento a konfirmá e fecha di reunion públiko riba e tema aki. Djabièrnè 17 di òktober 2025 pa 1or mèrdia lo tin deliberashon ku Minister Presidente, Minister di Finansa i hefe di Ontvanger enkuanto e grabashon ku a plama riba medionan sosial entre  Minister di Finansa i Ontvanger di Kòrsou. E punto di agènda ta pa kumpli ku petishon fechá 3 di òktober 2025 di miembronan mr. S.F.C. Camelia-Römer, mr. Q.C.O. Girigorie i mr. R.D. Larmonie-Cecilia.

Miéntras tantu spekulashonnan ta kontinuá i direktiva di partido MFK ainda no a emití un komunikado ofisial relashoná ku e reunion ku a tuma lugá djárason anochi ku nan kolega minister. Di su banda Minister Silvania ku semper ta hopi aktivo riba media sosial tambe ta den un silensio. Último biaha ku Minister Silvania a skibi algu tabata 7 di òktober último. Esaki despues di a informá su siguidónan ku “Si 4 aña ma lucha huntu ku bo pa mehora e pida baranka aki, si huntu nos a krusa frontera nan difísil, si huntu nos a marka historia ? Dikon awe lo mi bira lomba i laga bo para einan bo so ? Min ta skonde, mi ta duna kara paso mi sa ku bo ta konta ku mi.”

I awe ta bai rònt dos yamada pa manifestashon. Unu di un persona riba Facebook ku ta pidi siguidónan di sr Silvania pa lanta i protesta i miéntras un otro post ku ta hasi e petishon pa bin Punda dia 17 di òktober awor pa 11 or di mainta (e reunion di parlamentu ta 1 or).

Awe mainta  a tuma lugá e reunion solem di parlamentu i nos a nota presensia di 7 minister; minister Silvania tabata ousente te na momentu ku e reunion tabata tumando lugá.