WILLEMSTAD.- Miembro di Parlamentu pa MFK Fergino Brownbill a manda ayera mes un karta pa presidente nobo di Parlamentu sra Charetti America Francisca kaminda e ta pidi un reunion urgente pa atendé adaptashon di medidanan imponé riba pueblo basá riba e Lei di emergensia. Habri Kòrsou responsabelmente ku reglanan balansa entre e sektor di Salubridat Públiko i Ekonomia ta loke e karta ta bisa.

Den su karta sr Brownbill ta bisa ku despues di un “lockdown” di pueblo di Kòrsou ku a dura algun siman ku medidanan (manera plachi di dia, no por bai laman sierto orario, toke de keda, etc.), pueblo a kumpli kabalmente. Ku esaki pueblo a sakrifiká un bes mas, pa por a logra dominá e vírùs Covid-19. Den e periodo aki nos ekonomia tambe a sufri dañonan hopi serio debí ku no a tene kuenta ku e efektonan riba nos ekonomia i entradanan pa pais.

E parlamentario ta kere ku a yega ora pa habri Kòrsou bèk di un forma responsabel. Esaki ta enserá, kuida bida di nos hendenan pero alabes hasi posibel ku nos por sigui biba i funshoná. Espesialmente na aeropuerto i haf mester bini reglanan efektivo i stringente. Pa asina kuida nos “bubble” ku tantu sakrifisio nos a logra.

P’esei suskritonan ta hasi uso di artíkulo 64 insiso 4 di Reglamentu di Ordu (RvO) di Parlamento i ta aserka presidente di parlamentu pa yama un reunion públiko ku karakter di urgensia ku e punto di agènda ariba menshoná.