Un gran kompositor i tremendo persona

WILLEMSTAD.- Ayera a drenta e notisia ku e konosido músiko, kompositor i e fundadó prinsipal di ‘Fuerza II’, Reynold ‘Yuyu’ Djaoen a bai sosegá.

Despues di un temporada largu di malesa e tremendo kompositor aki ku tin un sin fin di éksito riba su nòmber a fayesé.

Yuyu Djaoen a forma parti di diferente agrupashon musikal, fundadó di ‘Fuerza II’, músiko den La Perfecta, Perfecta Son, Rissab i S.O. entre otro. Yuyu a komponé éksitonan grandi den e género di kòmbèk pa tur e bandanan ku nos a menshoná i hopi mas.

Ayera pa kasualidat nos a komprondé ku e popular animadó di radio den e género di kòmbèk, Sidney Stefania a presentá un kantidat di su éksitonan na radio.

Un tremendo persona ku un karakter fuerte, pero ku rèspèt serka su amigunan músiko.

E anunsio di fayesimentu di Yuyu a kore lihé i ta un kantidat di músiko ku a subi riba plataformanan sosial pa dirigí palabra na e gran músiko i deseá e famia forsa ku e pèrdida.

Su amigunan músiko di sigur Hopi Forsa den un ‘post’ riba facebook a indiká ku nan no por deskribí kuantu Yuyu a nifiká pa nan i pa e pueblo bailadó. ‘Danki pa krea nos, danki pa tur bo komposishonnan ku lo keda graba den nos tur su kurason. Palabra ta poko Yuyu, hamas nos lo lubidá bu’, asina e banda a pone riba nan página di facebook.

Ku Yuyu sosegá na pas. Forsa na famia i koleganan músiko ku e pèrdida.

LAGA UN KOMENTARIO

Please enter your comment!
Please enter your name here