Premier: Ta falta ku responsabilidat propio i kousa morto di otro

WILLEMSTAD.-Awe 16 di sèptèmber Kòrsou a konosé 23 kaso di hendenan ku a tèst positivo ku Covid-19. Manera EXTRA a informá mas tempran un parti grandi di e grupo di 23 hende aki ta di un grupo di kor ku a bai nan ensayo di kantamentu huntu i asina a plama e vírus. Por spera ku den dia i simannan ku ta bini lo presentá mas hende infektá for di e grupo direkto òf esnan ku tin relashon estrecho na e grupo. Premier Eugene Rhuggenaath den palabranan firme i bon kla pa informá komunidat ku ta nos hendenan mes ta pone ku mester kita e libertatnan ku tur hende a kustumbrá kuné. Apesar di tur esfuerso di un grupo grandi ku si ta tene nan mes na regla i kumpli ku medidanan di prevenshon tòg tin otronan ku no ta kumpli i esaki ta un di e konsekuensianan.

Premier a sigui mustra ku tur hende ta kòrda solamente riba nan derechonan sin wak nan responsabilidatnan, anto ta einan e problema ta sinta. Tur hende den e komunidat aki tin e responsabilidat pa mantené e medidanan i reglanan di prekoushon i asina yuda skapa bida di hende pasobra ora keda sin kumpli ku e medidanan aki esei lo kousa morto di otro siudadanonan. Gobièrnu ta trata na tuma medidanan den balansa, pèrkurando pa bida por sigui mas normal posibel, ta pèrkurá pa tur hende por mantené nan trabou i kumpli ku nan asuntunan mas tantu posibel, pero kon por logra si nos mes hendenan no ta komportá i no ta para pa responsabilidat propio. Premier Rhuggenaath ta keda yama danki na tur esnan ku si ta komportá, na tur esnan ku si ta tene kuenta ku nan próhimo, ku nan famia, ku a bisiña i koleganan.

Kòrsou tabata un di e paisnan ku tabata mas eksitoso den e lucha kontra di e malesa aki, i esei tabata pa motibu ku hopi hende a komprondé ku mester ta solidario ku otro i kuida. Apesar ku hopi hende den e komunidat aki ta pone bida na riesgo pa protehá otro, manera tur nos enfermeranan, médikonan, polisnan i tur otro pero tin hendenan ku simplemente no tin ku nes ku su próhimo.

E kantidat di persona ku lo keda hospitalisá lo oumentá, tin hende ku lamentablemente lo muri pasobra tin hopi hende vulnerabel i p’esei tambe e petishon pa yuda kuida nos hendenan dor di karga responsabilidat propio. Mester kambia e estilo di bida i tin 0 esküs pa esei. Por pidi Dios pa kuida nos pero kada un di nos tambe mester asumí su responsabilidat.