Spera pakete invershon i na mes momentu reformanan hopi nesesario

WILLEMSTAD.-Premier Eugene Rhuggenaath tabata satisfecho despues di e enkuentro den Konseho di Minister di Reino. El a duna di konosé ku a keda konfirmá den e reunion aki ku Kòrsou a kumpli ku kondishonnan basta fuerte ku tabata mará na e di dos tranche di yudansa finansiero. Esaki ta hasi posibel pa Kòrsou por yega na e di tres tranche ku tambe ta hopi nesesario, asina premier a informá EXTRA.

Minister presidènt ta papia di un kombersashon ku a tuma lugá den Konseho di Minister di Reino awe. Un aspekto sumamente importante ta ku a duna Ulanda e kompromiso polítiko di parti di Kòrsou. Den dianan ku ta sigui lo bai kaba di traha pa finalisá detayenan importante pa un akuerdo polítiko entre Kòrsou i Ulanda. E ta spera tambe ku pa otro siman lo haña otro den un akuerdo kompletu.

Mas aleu sr. Rhuggenaath a duna di konosé ku djadumingu awor ora ku e ta bini Kòrsou e sekretario di estado Raymond Knops tambe lo biaha pareu pa asina na Kòrsou kaba ku e deliberashonnan final. Por spera ku una bes tin e akuerdo final ku Ulanda ku Kòrsou lo por konta ku un pakete di invershon di parti di Ulanda i na mes momentu mester kumpli ku e reformanan ku ta asina nesesario. Premier a atmití ku e parti di implementashon di reformanan ta un reto i p’esei ta konta ku sosten di Ulanda den e parti di implementashon.