WILLEMSTAD.- Tur e kosnan ku a keda tresé dilanti durante di e 1 dia di trabou na Miami dor di parlamentario Schotte pa ku Avianca/InselAir no ta nada nobo. Tur e kosnan aki ta poné riba papel i palabra kaba, ta loke ku eks minister enkargá ku turismo sr. Eugene Rhuggenaath a duna di konosé na EXTRA.

Rhuggenaath a bisa di a tuma nota dje komunikado ku a bai rònt riba medionan sosial. E ta kontentu ku minister Errol Goeloe a kontinuá ku e trabounan ku el a bin ta hasi ku Avianca i On Vacation pa Kura Hulanda.

“Tur e kontenido ku mi a mira den e komunikado no ta nada nobo i ta kos ku mi  mes a papia ku e doño di Avianca dia nos a bishit’é na Colombia”. Rhuggenaath a bisa ku ta kosnan di último siman ku  e tabatin kombersashon intensivo ku Avianca ku a kondusí na  e “letter of intent” i ku tabatin un “heads of agreement” riba mesa. E eks mandatario ta spera ku minister Goeloe lo firma lihé pa yega na e aliansa ku Avianca.

Sinembargo Rhuggenaath tin dos punto di atenshon, kual ta ku Schotte den parlamento a bisa ku gobièrnu no ta bai pone mas sèn pa InselAir.  E 8 mion ku a sobra dje 33 mion, e parlamentario a bisa di lo pone den fondo di penshun pa trahadónan. Parti di akuerdo ku Avianca ta bisa ku miéntras tantu ta sigui papia riba kontrato final, ku tin 6 siman di tempu, gobièrnu ta sigui duna asistensia pa e kompania sigui bula i Avianca tambe wak kon ta yuda pa sigui tene InselAir na laira. Esaki ta un punto potensialmente ku por perhudiká henter e proseso, segun Rhuggenaath.

E di dos punto ta ku e detayenan ku a divulgá den medionan, ta puntonan ku for di aña pasá Avianca a pidi partidonan sinta na mesa, pa no hasi esakinan públikamente. Ta detaye sensitivo pa e proseso di negoshashon ku posibel aliansa stratégiko i tin kompetidornan. Ta ora yega na un akuerdo, e ora ei tin di sali i duna detaye di esakinan.

“Avianca ta un kompania ku tin reglanan i p’esei nos e tempu ei a bisa konsientemente, ku a papia ku doño di Avianca, pasobra e doño tin di bai board dje kompania”. E motibu ku Rhuggenaath ta ta bisa esaki ta ku e ta spera ku e publikamentu den detayenan no ta bai ta estorbo dje proseso. Esaki ta dos punto di atenshon.

Rhuggenaath ta spera ku sr. Goeloe lo firma e “heads of agreement” i otro kosnan ku a papia riba dje. Tambe sr. Rhuggenaath a kuestioná ta den ki kalidat Schotte ku ta un parlamentario, a bai papia ku e doño, i palabrá kosnan nobo. Pasobra esaki mester bai ku aprobashon di akshonista i tambe e curator ku ta atendé ku InselAir.

Loke ku Schotte a skibi no ta nada nobo i no ta kos ku ta logra den un dia di trabou, e lider di PAR a bisa EXTRA. A aserká Avianca dor ku e tabata un bon ‘fit’ pa InselAir i ta trese stabilisashon pa hasi InselAir bon bèk pa futuro.

Pa loke ta trata otro proyekto ku Schotte ta papia di a logra ku ta On Vacation (Kura Hulanda), tambe minister Rhuggenaath a bisa ku esaki no ta nada nobo.

“Na fin di 2015 ora mi a bira minister mi a keda introdusí na On Vacation huntu ku minister Jardim. Pasobra tabatin un kuadro kaba kiko gobièrnu mester hasi pa traspaso debí na debe ku tabatin ku banko/instansia finansiero. Tur kuater instansia mester a bai di akuerdo ku e kuadro di gobièrnu. Promé ku mi a baha, ya kaba tabatin un akuerdo i loke ku gobièrnu mester a hasi ta ehekutá algun kos. Mester a ‘schrijf af’ algun debe di belasting, debe na Aqualectra i tambe e erfpacht cannon pa keda meskos i mester a renob’é. Ta algun kos ku gobièrnu mester a ehekutá. Tur loke ku tin den komunikado no ta kos nobo. Ta algun trabou tin pa hasi, i mi ta spera ku esaki si ta keda kla den un dia di trabou”, sr. Rhuggenaath a bisa.

E ta positivo i kontentu ku minister Goeloe a sigui ku su proyektonan i spera keda kla mas pronto ku ta posibel. On Vacation su modelo ta yena charter pa nan turista bai destinashon unda nan tin hotèl. Kòrsou ta ‘fit’ nan kliente i hopi serka di Bogotá. Esaki tambe tin un impakto positivo pa e aliansa di InselAir/Avianca, segun sr. Rhuggenaath.