PIN; pa kolmo ta atendé Covid lali-lali

WILLEMSTAD.- Partido PIN den un komentario ta indiká ku nan a keda sumamente asombrá di tuna nota ku gabinete Pisas ta tuma medida pa baha nivel di kuido. Den e medidanan akordá pa Konseho di Minister dia 30 di yüli último, na lugá di wak unda tin ekseso di uzo òf ganashi den e kadena di salubridat, riba komando di sr. Knops, gobièrnu Pisas a disidí di kòrta direktamente den e kalidat i kantidat di kuido ku komunidat por disponé di dje. Loke ta hasi e asuntu mas grave ta ku e lista largu di medida ningun kaminda no ta menshoná prevenshon. Esaki ta bin riba e echo ku e gobièrnu aktual ta atendiendo ku COVID na un manera lali-lali, peligrando kuido di hospital.

Pa partido PIN ta masha remarkabel kon minister Silvania a habri afó kontra ekspertonan su idea pa gradualmente eliminá e bono di Pasku pa kobradónan di AOV. Sinembargo ta parse ku sr. Silvania i sobra ministernan ta di akuerdo ku e sobrá konsehonan dje mes ekspertonan ei. Konsehonan ku kada un riba nan mes ta kòrta drástikamente den e kantidat i kalidat di kuido ku Ma Yeye mester di dje.

Sin ningun debate públiko òf interkambio ku Parlamento, gobièrnu Pisas ta kòrta di forma indeskriminá un èkstra 10 % (ke men e rekorte ta bira total 20%) den AOV di esnan ku ta biba afó i asina ta ignorá e sentensia di Korte di Hustisia di 1 di mart 2021. Tambe a disidí entre otro ku lo stòp di paga pa transplante di kurason, pulmon i higra. Tur esaki siendo ku ta bon konosí ku nos pais tin un dje sifranan mas haltu di malesa ku ta afektá kurason, pulmon i higra.

PIN lo por tabatin komprenshon si e gobièrnu aki lo a kompañá su medidanan ku un programa di prevenshon agresivo manera eks minister Camelia-Römer a inisiá. Sinembargo ta parse ku e komando di sr. Knops i minister di Finansa sr. Silvania ta e úniko kompas ku gobièrnu Pisas konosé.

Ta di lamentá ku gobièrnu Pisas ta hunga un wega di kosmétika inefektivo kargando empresanan ku tur gastu di 3 dia adishonal di riesgo propio pe trahadó den kaso di malesa. Meskos ta konta tambe ku movementu di e gastunan di tèstnan sikológiko estudiantil pe ministerio di edukashon.

Ta parse ku ‘bùrt pa pueblo’ a bira ‘bùrt pa hacha’, asina PIN ta finalisá. Mas detaye den edishon di EXTRA.