WILLEMSTAD.-E instituto ulandes Rijks Instituut Volksgezondheid en Millieu (RIVM) ta indiká den su último rapòrt ku e medidanan limitá ku islanan di Karibe Hulandes a tuma, no ta sufisiente pa frena e oumentu alarmante di kasonan di Covid19. Den un reportahe NoticiaCla ta mustra ku no ta konosí si RIVM ta referí na e 4 medidanan anunsiá djaweps atardi na Aruba, ya ku e reportahe di RIVM a keda publiká djaweps 7pm ora di Hulanda ku ta 1 or di atardi di Aruba. Kòrsou si no a tuma medida adishonal y a anunsiá p.e. djaweps mainta ku nan ta djis ‘monitoria’ e situashon e wikènt aki y ta dependé despues si nan ta tuma medida. Pa loke ta RIVM, nan ta sigui bisa tambe ku e kantidat di kontagio y hospitalisashon ta oumentá di un forma konstante, y gran parti debí na e sirkulashon grandi di e variante Delta. Segun RIVM, esaki ta probablemente debí na e oumentu di turista riba e isla ‘ku ta resultá den un interakshon sosial oumentá’.