Bini, mira, eksperensiá i deskubrí mas!

WILLEMSTAD.- Direktiva di Skolnan Katóliko (RKCS) ta invitá tur hende pa partisipá na un eksperensia edukativo i interesante riba djasabra 4 di novèmber 2023 durante 'Destination RKCS'. E evento lo tuma lugá den Sambil Convention Center i lo ofresé un biahe ku hopi variedat den e posibilidatnan edukativo ku skolnan di RKCS ta brindá.

RKCS ta responsabel pa supervishon di 49 skol na Kòrsou, ku huntu ta brinda enseñansa na 53% di e poblashon di alumno di nos isla. E evento ta un oportunidat pa mayornan, alumnonan i komunidat den su totalidat eksperensiá e enfoke edukativo úniko di RKCS, variando for di enseñansa preparatorio, enseñansa di fundeshi, enseñansa spesial, skolnan di enseñansa sekundario (VSBO, HAVO i VWO) i enseñansa vokashonal (SBO).

Durante e evento 'Destination RKCS', lo tin e oportunidat pa haña mas komprendementu tokante e diferente posibilidatnan edukativo di e 49 skolnan di RKCS. Por ehèmpel, lo tin un kues  entre gruponan di alumnonan di skolnan di VSBO i lo por mira un simulashon di un klas di enseñansa fundeshi kompletamente digital. Tambe, alumnonan lo mustra nan talento i pashon pa arte i kultura ku presentashonnan interesante i kreativo.

Durante bishita na e stèntnan di e skolnan, lo tin e oportunidat pa siña mas tokante e balornan i dedikashon di RKCS na enseñansa di kalidat. E evento ta un selebrashon di e mishon i vishon di RKCS, i ta brinda oportunidat pa komprondé e motibu pa kual míles di mayornan durante e último 53 añanan a pone nan konfiansa den nos skolnan katóliko, kaminda maestronan ta duna enseñansa ku hopi amor i pashon na hóbennan.

Pues, 'Destination RKCS' ta primintí di ta un dia yen di eksperensia diferente, deskubrimentu i inspirashon. Bin disfrutá djasabra 4 di novèmber na Sambil Convention Center for di 1 or di mèrdia te ku 7 or di anochi. Entrada ta grátis.