WILLEMSTAD - Riba djasabra, 21 di sèptèmber 2024, Fundashon Ronald McDonald House Charities (RMHC) Curaçao a organisá su di 14 anual RMHC Golf Classic na e kancha di gòlf Old Quarry, situá na Santa Barbara Plantation. Danki na e sosten generoso di spònsernan klave inkluyendo Maduro & Curiel’s Bank, KLM, Sandals, Old Quarry, i Staat Notariaat—e evento di rekoudá fondo aki a logra éksito remarkabel.

Un total di 42 ekipo, kada un konsistiendo di kuater hungadó, a partisipá na e torneo. E evento a kuminsá ofisialmente riba djabièrnè, 20 di sèptèmber 2024, ku Anochi di Inskripshon ku a tuma lugá na e VIP Spectator Lounge na Hole 18, diseñá pa Old Quarry. Partisipantenan a disfrutá di vários evento patrosiná pa Coca-Cola, The Wine Factory, Heineken, KLM, McDonald’s, Lovers, MCB, Jeep, Baoase, Lab de Med, Venequip, i Café Barista.

Fundashon RMHC Curaçao por mira bek riba e torneo di e aña aki ku hopi orguyo i lokual a resaltá ta e ambiente amistoso pero tòg kompetitivo ku tabata reina bou di e ekiponan. E RMHC Golf Classic a establesé su mes komo e evento di gòlf mas grandi i mas popular riba e isla, reforsando su ròl den e komunidat deportivo lokal. Un momentu ku a sobresalí tabata e presentashon bibu di DJ Menasa durante e Seremonia di Premio, agregando un toke festivo na e okashon.

Un biaha mas, e RMHC Golf Classic a mustra e sosten fuerte di e komunidat di Kòrsou pa e mishon esensial di e fundashon: garantisá ku famianan ku yunan malu òf médikamente kompleho por keda serka di nan yu i duna e mihó kuido posibel.

RMHC Curaçao ta ekstendé un danki di kurason na tur e kompanianan ku a kontribuí na e evento. Nan sosten ta hasi posibel ku e fundashon por sigui duna servisio vital na muchanan malu i nan famia, inkluyendo akseso na Family Room na Curaçao Medical Center (CMC) i otro programanan krítiko ku RMHC ta ofresé.

Aki ta sigui e ganadónan di e RMHC Golf Classic 2024:

Di 6 Lugá: Tim SIXT

Di 5 lugá: Team MMO Tax Advisors

Di 4 Lugá: Team CITCO

Di 3 Lugá: Team MyMalls

Di dos lugá: Tim The Wine Factory

1er Lugar: Team Old Quarry Golf Course, consistiendo di Sjoerd Poort, Geert Rep, Marco Meeuwsen, i Jake Coldiron, procedente di Merca, Bonaire, Aruba i Sürnam.