WILLEMSTAD.- Ayera alrededor di dies pa shete di anochi Sentral di Polis a risibí notifikashon di un kiebro ku a tuma lugá na ‘Kruithuis’ Brievengat.

For di un investigashon ku polis a hasi na e sitio a resultá ku deskonosínan a kibra kònteiner den kua tabatin vürwèrk i a bai ku un kantidat supstansial di vürwèrk sumamente peligroso.

Un di e kònteinernan sigur tabata unu basta grandi i ekipá ku vürwèrk nan spesial pa shownan grandi.

Pa por sende e vürwèrk nan aki mester di ekipo spesial i nan no por wòrdu sendé pa loko.

Tambe a kue klapchinan tambe ku mester keda sende den solamente awa.

Segun eksperto den vürwèrk Gustavo Semeleer, vários di nan ta di ‘label’ ku ‘label’ spesial di e kompania 3D Fireworks.

Un apelashon ta bai na esnan ku a hòrta e vürwèrk nan aki pa no hasi uso di nan debí ku ta trata di vürwèrk hopi peligroso.  Tambe un yamada ta bai na komunidat pa den kaso ku nan sa i òf mira persona ku ta den posishon di e vürwèrk nan aki pa tuma kontakto inmediatamente ku polis via di e numbernan 917 i 108 ku ta e number anónimo.

Polis ta konta ku koperashon di komunidat pa asina ei evitá kualke desaster

OJO, no kumpra vürwèrk hòrtá pasó e por kosta bo bida!