Preguntanan na gobièrnu St.Maarten relashoná ku atkisishon portafolio FirstCaribbean Bank

PHILIPSBURG.-E kompra di Orco Bank pa e portafolio di CIBC FirstCaribbean Bank ta hala atenshon na St.Maarten tambe. EXTRA a tuma nota ku e futuro polítiko Quincy Rochester ta pidi gobièrnu di St.Maarten atenshon pa e kaso spesífiko. E preokupashon ku Rochster ta ekspresá ta pa e futuro di e trahadónan i nan famia ku ta keda desampará i e konsekuensianan ku esaki tin pa e isla.

E polítiko den preparashon ta para ketu na e informashon ku a bira konosí relashoná ku e desaroyonan den sektor bankario den kua Orco Bank ta kumpra e portafolio di CIBC FirstCaribbean Bank. Esaki ta nifiká pa St.Maarten ku 25 trahadó di e isla ta haña nan retiro. Pa un isla manera St.Maarten esaki ta nifiká un impakto konsiderabel.

Ta den e kuadro ei Rochester a pidi gobièrnu di St.Maarten pa duna klaridat kiko ta e intenshon di gobièrnu komo reakshon riba e situashon aki. E retironan ta motibu di hopi preokupashon den e komunidat di St.Maarten ya ku esaki tin su impakto mas amplio ku solamente e 25 trahadónan.

Ta pidi informashon si gobièrnu ta konsiderá pa tuma medida òf si akaso ta bai hiba un òf otro negosiashon konsiderando e bienestar di siudadanonan den e komunidat. Transparensia ta krusial pa realisá konfiansa pa asina komunidat ta bon informa di pasonan ku gobernashon ta plania pa tuma na nan benefisio.