WILLEMSTAD.- Dia 3 di desèmber ta Dia Mundial di Hèndikèp. Ku e meta pa amplia e solidaridat ku e grupo di spesial aki di hende ku limitashon den nos komunidat, Rode Kruis ta organisá un “Paranda di Alegria” dia 2 di desèmber.
Meta di e aktividat ta pa krea konsiensia serka e komunidat di Kòrsou pa ku hendenan ku limitashon. Tambe un biaha pa aña tira lus riba hende ku limitashon i por último stimulá solidaridat i e disponibilidat di yudansa di kompanianan dor di krea un espasio mas amplio pa e hende ku limitashon por kore stazje, of siña traha.
E Parada di Alegria lo keda realisá ku vehíkulonan grandi manera Ambulans di Rode Kruis, Katerpila, busnan grandi, trùknan di brantwer, trùknan grandi, ku lo pasa riba e ruta di karnaval di Mucha.
E hendenan ku limitashon lo sinta den kabina di e trùknan.
P’esei ta hasi apelashon na komunidat pa riba e dia aki para kantu di kaminda i animá e muchanan. E trùknan tur lo keda dòrná ku balònnan i lo basha pitu durante di nan trayektoria den kaya.
E gruponan ku lo forma parti di “Paranda di Alegria” ta klientenan di Totolika, Fundashon Kontakto i SGR Groep.
E parada ta kuminsá na Sambil, pasa den Marchena, Weg naar Wlgelegen, Roodeweg, Breedestraat, Brionplein, Pater Eeuwensweg, Helmin Magno Wiels Boulevaard i ta finalisá na Sambil.