WILLEMSTAD.- E kondenado na bida largu Romero Canword (61) ayera a bolbe presentá dilanti e tribunal di Hof pa revishon di su kaso, mirando ku e tambe a yega 20 aña di kastigu i mester evaluá si e ta kla pa drenta komunidat.

Den inisio di e kaso anterior e tribunal a pidi algun informashon, riba vários aspekto, pa sa kiko ta e mihó desishon promé ku yega dje leu aki.

Canword a keda kondená pa asesinato di tres hende muhé,  di kual dos el a atmití  su kulpabilidat i un di tres ku nunka el a atmití, pero Ministerio Públiko ta konvensí ku el a kometé e echo.

E ta keda akusá di a sekuestrá un dama, hink’é den outo , asesin’é i tir’é den mondi den área di Janthiel, pa despues tap’é.

Na aña 2000 el a keda kondená, despues ku den korte penal di Promé Instansia a sentensiá Romero na 15 aña, pero den apelashon, el a haña bida largu.

E tempu pa revishon konforme lei di Kódigo Penal, a yega pa revisá e kastigu di Romero pa sa si ainda despues di 20 aña e kastigu imponé di bida largu tin sentido.

Ayera un bia mas Romero a presentá den sala di korte. Ruman di e víktima tambe tabata  presente pa presensiá e kaso.

Segun rapòrt sikológiko, Canword tin hopi kos mas di drecha.

Segun sikiater mester bin un trayekto di resosialisashon pa Canword, pa asina sa dikon el a komportá su mes di tal forma i yega na e ekstremo en kuestion.

Tambe mester wak si e mes sa e motibu dikon el a kometé e asesinato. Tur esaki por hasi solamente a base di kòmbersashonnan ku tin ku hiba ku e akusado.

Mas aleu mester wak si tin algun aspekto patológiko ku  e akusado, promé ku sigui ku e trayekto i prosedura.

Promé ku revisá su kastigu, konforme lei ta stipulá.

E kaso lo kontinuá na òktober binidero pa wak si lo habri e evaluashon.