WILLEMSTAD.- Dia 23 di aprel 2020 Romero Canword su kaso lo keda tratá den korte, husgando e kastigu di bida largu ku el a haña na 2000. Den prensa e dianan aki a sali ku el a entamá kaso den korte anteriormente, pa e keda husga komo mentalmente malu pa asina e por bai kas. Canword; esaki ta fakenews (No publiká den EXTRA).

Den deklarashon na EXTRA, for di prisòn, Canword a bisa ku den promé instansia el a keda sentensiá pa 15 aña di prisòn. E kaso a  keda apelá i den apelashon a subi e kastigu na bida largu. El a keda husgá pa 3 asesinato, pero Canword a bisa EXTRA ku e ta rekonosé 2 i no 3. E di tres asesinato ku tabata e stewardess ku a disparsé, e no por tuma riba dje pasobra e no sa nada di esei.

Canword a sigui bisa ku na 3 okashon el a bai korte pa pidi pa e haña su dosié den e kaso aki. Nunka por a dun'é su dosié. Dado momentu ora el a hañ’é será na Ulanda, debí ku orkan Irma a pasa St. Maarten i el a keda trasladá, el a bai Korte Oropeo. Einan nan a bisé ku normalmente lo no atendé kasonan di e islanan aki, pero mirando su kaso nan ta haña straño e kastigu di bida largu. A manda e kaso bèk pa e kaso keda tratá aki bèk, pa mira si e kastigu di bida largu ku el a haña ta korekto.

I na einan e ta aktualmente, dia 23 di aprel otro aña, korte lo bai “toets” e sentensia di bida largu.

“Mi a faya i niun hende por kambia mi, ta mi mes mester kambia mi mes. Den e tempu ku a pasa aki mi a realisá ku mi tabata kompletamente fout bezig. Mi ta aseptá ku mi a faya i mi a kambia. Mi a yega na pas interno”, asina el a bisa EXTRA.

“Mi ta spiritualmente fuerte, mentalmente fuerte i físikamente salu”, asina el a sigui bisa indikando ku nos tur tin fayo, un mas ku otro. Pero den su kaso e ta haña ku ta un wega polítiko tabatin pasobra for di ora el a kai sera un reshèrshi a bisé ku e ta bai haña bida largu. E ta spera ku awor si lo por atendé su kaso korektamente.