WILLEMSTAD.- Direktiva di Ronald McDonald House Charities Curaçao (RMHC) ta sumamente orguyoso ku despues di hopi aña di lucha, sra. Zita Jesus-Leito, Minister di Salubridat, representando Gobierno di Kòrsou a entrega un akuerdo formal, pa ku integrashon di RMHC na HNO. Esaki ta sòru ku RMHC su servisionan na mayornan i muchanan malu ku wòrdu interná den hospital por wòrdu garantisá den e próksimo generashonnan.
Direktiva di RMHC ta lucha pa kontinuá ku e servisio i fasilidatnan ku e ta bin ta brinda e último añanan aki na famianan di muchanan ku ta na hospital. Semper RHMC a aktua konforme prosedernan i reglanan ku ta mara na e proseso pa muda di SEHOS pa HNO pa loke ta Minister representando Gobierno di Kòrsou, Usona, komo dirigente di e proyekto i Konseho di bestür di SEHOS ku lo hasi uso di HNO.
RMHC ta hasi posibel pa tene famianan huntu den temporada di hopi tenshon durante enfermedat di nan yu. Nan ta hasiendo esaki for di 2012 aki a Kòrsou, ku un di e programanan prinsipal di RMHC, kual ta “Family Room” i huntu ku esei, kambernan di drumi spesial pa mayornan por keda durante hospitalisashon di nan yu.
RMHC ta dependé di su patrosinadornan aki na Kòrsou i a sa di gana e konfiansa den sektor priva i pueblo di Kòrsou en general, pa e motibu aki bestür, miembro di staf i tur boluntarionan, ta sumamente orguyoso i lo sigui traha dia i anochi pa mantené e konfiansa di Pueblo di Kòrsou i di e forma aki nan lo sigui krese.
Indikashon di e lokalidat na HNO i tambe e grandura nesesario a tuma lugá entre RMHC i USONA. E resultado ta ku e lokalidat lo no trese un problema pa e otro áreanan inkorporá segun e plan. Tantu komo e lider di proyekto/ arkitekto di e proyekto i e Presidente di Quality Performance Board, den kalidat di representante di e trabounan Gobierno di Kòrsou, a duna den luna di mart 2016, un último konseho positivo formal na Minister pa ehekutá e kambio. Den e último konseho a wòrdu stipulá ku e gastunan di e kambionan den konstrukshon lo wòrdu karga pa RMHC. Ku otro palabra lo no a kosta niun sèn èkstra pa hasi e kambionan nesesario ku lo ta na interes di e departamento di mucha na HNO.
Logro di e akuerdo nombrá, di kual RMHC ta konsiderá algu tremendo ta ku HNO lo wòrdu rekonosé rònt mundu komo hospital plasentero pa mucha, djis pasobra nan ta parti di e programa di RMHC. E programa ku RMHC ta ofresé rònt mundu na muchanan, famianan i hospitalnan, manera aki na Kòrsou, pa yuda ku e kuido nesesario pa rekuperashon di e mucha, kaminda e kalidat di bida, i ménos stress ta hunga un ròl hopi grandi pa e mucha i e mayornan. Esaki ta nifiká ku sèn ta wòrdu di spar ora un mucha wòrdu interná.
Miéntras tantu tin den e último 5 añanan den kual RMHC a ofresé su servisio na mas ku 8555 famia di muchanan ku tabata sufri di un malesa i ku tabata interná na SEHOS, i realmente RMHC no por imaginá Sekshon di mucha di SEHOS sin dje.
RMHC:
E fondo rekoudá ta permití pa kontinuá ku e trabounan den RMHC Family Room i tambe yuda desaroyá inisiativanan importante ku lo benefisiá nos komunidat i espesialmente nos muchanan. For di su establesimentu aki na Kòrsou RMHC a sòru pa identifiká, desaroyá i traha riba proyektonan ku ta apoyá programanan ku ta direktamente konektá ku salú hubenil riba término largu. Ku e Family Room, RMHC Curaçao Foundation a sa di yuda mas di 5000 famia i mucha na Kòrsou ofresiendo nan no solamente un área di rekreashon konfortabel na muchanan interná den hospital pero tambe ta brinda mayornan i famianan di muchanan aki un kamber konfortabel pa hospedá den dje ya nan ta serka di nan yu.