WILLEMSTAD.- Komishon sentral di sindikatonan di Kòrsou (CCvV) tin un presidente nobo. Manera ta konosí Mario ‘Totty’ Chirinos, ku tabata presidente di CCcV, a fayesé den luna di desèmber di aña pasá. George Hernandez, ku tabata visepresidente, a fungi komo presidente den e último lunanan. Awor Ronaldo Abrahams, eks-presidente di sindikato di polis NAPB, a keda proponé komo presidente nobo. Esaki presidente di NAPB, Thaise Isidora-Lo-A-Njoe a duna di konosé. E periodo pa e presidente nobo ta entre 1e di mei 2021 te 30 di Aprel 2022. Tur aña un di e sindikatonan ABVO, NAPB, STrAF, SAP en Sitek por proponé un presidente nobo di CCvV.
CCvV ta e plataforma di deliberashon di sindikato pa ámtenarnan den CGOA. CGOA ta e plataforma di konsulta entre gobièrnu i sindikatonan ku ta representá empleadonan públiko.
Abrahams tabata presidente di NAPB pa basta aña. Den aña 2019 el a retirá pa motibunan di salu. Pero awor e ta sinti su mes hopi mas mihó. Segun Isidora-Lo-A-Njoe a opta pa proponé Abrahams pa motibu di su eksperensia i su konosementu.
CCvV ta reuní un bia pa luna riba e promé djaweps di e luna. Tópiko di e reunion ta tur aspekto ku tin di aber ku posishon di derecho di ámtenarnan. I tambe relashoná ku maneho di gobièrnu den kuadro di aspekto di personal di gobièrnu.
Abrahams ta spera ku den e próksimo aña ámtenarnan lo mira mehorashon di nan posishon. ‘Manera nos tur sa posishon di ámtenar pa basta tempu no a drecha. Na mi opinion tin ku drecha nan situashon di labor. Si no, tin un chèns ku situashon pa ámtenarnan ta bira hopi fèrfelu. Niun hende ta deseá pa ámtenarnan kai den e grupo di hende pober den nos komunidat.’
Komo presidente di CCvV Abrahams ke traha pa mehorá situashon di labor pa ámtenarnan. Visepresidente di CCvV for di 1e di mei ta Amado Vilchez di SAP.