WILLEMSTAD.- Despues ku na 2020, Festival Un Kanto pa Kòrsou no por a kontinuá pa motibu di COVID-19, Instituto pa Formashon Musikal ta hopi agradesido ku Gobièrnu di Kòrsou a bai di akuerdo ku un presupuesto redusí pa e Festival por kontinuá. Un Kanto pa Kòrsou a tuma lugá djasabra pasa den Festival Center. Un públiko hopi chikí pero hopi animá presente a aploudí tur e 14 komposishonnan. Den dos ei e kansionnan tabata tres kantante.

Esnan ku a klasifiká tabata  Ebony Gwenn Martis, Joyceline Cornelia, Ronalys Libiee-Casimiri, Thallisa Jano, e trio di Nathelie Laurijsen-Kopra, Shently Sophia-Zimmerman i Naemy Kirindongo, e otro trio ta Angie, Faith i Shannon Schonewolf i tambe Yumayra Krijt.

E di dos finalista a sali Thalyssa Jano ku e kansion E Spil di nos realidat, e promé finalista e trio di Angie, Faith i Shannon Schonewolf ku e kansion Rekonosementu di nos hendenan. E ganadó i tambe mas popular a resultá Ronalys Libiee-Casimiri ku e kansion Amor lo Prevalesé. E kansion a keda areglá pa Randal Corsen i komponé pa Eldrison Eugenia ku por sierto tambe a komponé e kansion ku a sali di dos finalista. E promé finalista a keda komponé pa Ike Jesurun.