WILLEMSTAD.- Despues di e diskushonnan ku a surgi den fin di siman, ora a saka for di supermerkadonan webu mas karu ku ta stipulá den makutu básiko, EXTRA a papia ku señor Ronny Cornelis di MEO ku a splika lo siguiente;

Segun sr. Cornelis e diferensia ta masha simpel. Ora kontrolá pan, ku tambe ta den makutu básiko, por mira e kalidat di pan. Tin pan mas karu ku otro, esaki debí na ingredientenan entre otro ku ta usa den e pan. Tin pan ta yega te 6 florin por ehèmpel. I lei ta stipulá tambe kon i kiko e pan den makutu básiko ta kontené.

Pero den kaso di webu segun sr. Cornelis, no por mira pafo di e webu si ta scharreleieren òf ku e no ta.

En bèrdat na otro paisnan scharreleieren ta mas karu pasobra su kalidat ta otro.

“Scharreleieren ta un forma diferente di haña webu di galiña. Aki e galiña no ta bai den kouchi  tur pèrtá riba otro, pero ta kria esaki den un forma manera na kas. E ta den un kurá grandi i ta lag’é pone webu den su forma normal, den tur trankilidat. E galiña aki ta kome otro tipo di kuminda tambe. I p’esei e webu aki ta mas karu ku e webu kaminda e galiña ta den kouchi riba otro den un sorto di ‘Legbaterij’.

Den kaso di kontròl segun sr. Cornelis, no por wak di pafó i sa ku ta un scharrelei òf no. Por manipulá tambe fásilmente i kua e webu ku ta den makutu básiko i bende komo scharreleieren.

Ta te ora habri e webu por wak su kalidat. I ta kiko tin di hasi e ora ei, tin di bai kibra un pa un e webunan?

Esaki ta pone segun sr. Cornelis ku den makutu básiko no ta hasi distinshon di tipo di webu pero lei ta papia di webu i esei ta mará na preis.