WILLEMSTAD.- Elsa Rozendal ta kandidato pa bira lider polítiko di partido Democraat. Durante un reunion di konseho di partido djadumingu 10 yanüari a trata su kandidatura.

Konseho di partido a aprobá e kandidatura I a proponé Rozendal pa e puesto. Durante reunion di asamblea general di partido ku ta tuma lugá mañan, mester aprobá e kandidatura di Rozendal. Si aprobá esaki Rozendal por tuma alabes asiento komo miembro di direktiva di Demokrat i lo ta number 1 riba lista di kandidato di e partido pa próksimo elekshon.

Ku tur probabilidat number 2 riba lista lo ta Stephen Palm ku ta presidente di direktiva. Tambe Partido Democraat mester yena e puesto di sekretario di direktiva ku a bira vakante na momento ku Dean Rozier a tuma retiro for di e partido.

Rozier su kompromiso ku Democraat tabata di durashon kòrtiku. El a drenta ku hopi ambishon i ke a bira lider polítiko apesar ku tabatin otro palabrashonnan den seno di partido. E situashon a kulminá den wikènt tras di lomba durante un reunion di direktiva ku a tuma lugá djasabra.

Einan desishon a kai ku Rozier i Democraat ta sigui nan kaminda separá for di otro. Lamentablemente ya tabatin artíkulonan i mensahenan via medionan sosial ta bai rònt ku a tira un lus negativo riba desaroyonan den e partido.

Asta tin rumornan falsu ta sirkulando di hendenan ku no ta ni miembro di partido Democraat ku lo ta envolví den toma di desishon di direktiva di partido.