WILLEMSTAD.- Pa basta tempu tin pensamentunan ku a lanta pa konstruí un kaminda alternativo pa e region di Bándabou. Den e kaso aki ta papia di un kaminda ku ta kore na e kosta zùit di Kòrsou patras di COT via di Bullenbaai. E no ta imposibel, pero un proyekto manera esaki tin su retonan. Esei EXTRA por komprondé for di un proyekto/plan ku a keda lansá for di aña 2000 ku ta enserá un ruta alternativo pa Bándabou. E plan aki a keda presentá na gobièrnu e tempu ei dor di e kompania Curaçaose Wegenbouw Maatschappij.

E ta bisa ku na 1989 a hasi un investigashon pa sa kiko un di dos karetera pa Bándabou lo a nifiká. Téknikamente pa esaki lo tin posibilidat pa dos ruta. E promé lo por kore patras di Curaçao Oil Terminal (COT) na Bullenbaai ku lo bai sali riba Weg naar Bullenbaai. E di dos posibilidat ta pa traha un kaminda kompletamente nobo pero via di plataforma di Hato.

Ruta via di COT:

E konekshon aki parsialmente ta hasi uso di e kaminda eksistente di Weg naar Bullenbaai, via di COT i ta pasa dwars dor di e bario di Jandoret. E ruta aki lo laga un parti grandi dje desaroyonan na man robes, ku ta enserá entre otro e posibilidatnan pa mehorashonnan ku lo mester a hasi e tempu ei den Zona Liber na Hato. Asignashon di Hato komo “Groeipool 2006” pa krea empleo i fortifiká ekonomia di Kòrsou lo kore peliger si habrimentu dje zona aki rondó di Hato ta malu. Den un kaso asina e variante ei lo no ta na benefisio di Hato. Ta bini aserka ku Weg naar Bullenbaai téknikamente no ta apropiá pa akapará volúmennan grandi di tráfiko i e peso di vehíkulonan grandi.

Esaki lo trese kuné ku kasi henter Weg naar Bullenbaai lo tin di ser fortifiká i tin kaminda ku asta lo mester ser rekonstruí. Mas aleu patras di COT e kaminda tin di pasa riba un tereno inapropiá, loke ta trese kuné ku tin di hasi hopi adaptashon pa por hasi e ruta aki adekuá pa tráfiko di karga. Presisamente pa motibu ku ta di sumo importansia pa e parti wèst di nos isla no tin solamente un karetera, den EOP a reservá e ruta menshoná komo unu pa futuro, bou dje kondishon ku esaki lo mester ser mirá si komo un ruta pa outo di famia (ku ta mas di 95% di vehíkulonan) i pa kasonan di emergensia.