THE BOTTOM.- Ayera promé ku 12or di mèrdia e isla di Saba a surpasá e marka di 1.000 vakunashon, i por bisa ku srta. Janelle Barnes tabata e di mil persona pa a risibí e vakuna di Moderna. Gobièrnu dje isla ta konsiderá e programa di vakunashon aki komo unu altamente eksitoso.

T’asina ku e programa di vakunashon di Saba a inisiá djaluna último ku 260 persona vakuná riba un dia. Riba djamars, pues e di dos dia a surpasá e marka di 500 ku un total di 546 persona risibiendo e angua kontra COVID-19. Djárason e dia di vakunashon a tuma lugá spesialmente pa hendenan di edat haltu riba e isla i na kas i esnan den e programa di Life Center, i asina a yega un total di 623. Djaweps ya kaba el a alkansá 908.

Departamento di Salubridat huntu ku Saba Health Care i ku asistensia di Krus Kòrá a pone ku e programa a kana sin problema. E dedikashon i servisio amikal ku a kompañá e programa aki a kontribuí tambe na su éksito. E tim di vakunashon a bin ta traha den diferente warda di 8 ora pa dia i kada ken ku tabata miembro di e tim a sa di kumpli ku nan tarea. Den e programa aki tin kordinadó, registradó, personal pa pasa angua, enfermeronan, personal di opservashon, dòkter i un manager.

Personanan ku mester vakuná promé ta yega na punto di chekeo, despues a pasa pa e punto di registro. Despues di esei tin komo tres punto di vakunashon, di kual dos ta ser usá riba un base kontinuo, i un di tres pa den kaso ku e situashon bira un tiki kongestioná. Unabes ku e persona risibí su vakuna e ta bai sinta den un kamber durante 15 minüt pa opservashon.

Pero representantenan di gobièrnu i esnan den kuido a konsiderá esaki te ainda komo un bon eksperensia. Aworakí a sobra dos dia mas di vakunashon pa loke ta e promé buèlta, ku ta awe i djaluna 1 di mart. Ámbos dia ta pa personanan ku no a registrá promé i esnan ku no por a alkansá pa presentá pa nan promé sita.

E di dos buèlta di vakunashon ta programá pa start denter di 4 siman.