THE BOTTOM.- Saba a konkluí éksitosamente su di dos ròndu di vakunashon kontra COVID-19. En total 1300 persona adulto a keda vakuná pa e di dos bia, miéntras ku 42 adulto a haña nan promé vakuna.

Den e promé ròndu di vakunashon na febrüari último, 1333 adulto a keda vakuná pa Moderna. Den e di dos ròndu na mart, e kantidat a baha un poko, den e kaso aki ku 33 persona ku no a bai pasa nan di dos vakuna pa diferente motibu. “Nos ta spera ku mayoria di nan lo bin pa e di dos vakunashon na fin di aprel”, asina e hefe di e departamento di salubridat públiko dr Koen Hulshof a bisa.

Na final di e di dos ròndu tin 1375 persona ku a haña por lo ménos nan promé vakuna/ mas di 85% di e pueblo adulto di Saba awor ta kompleto vakuná, ku ta un porsentahe hopi haltu. “Mi ta kontentu ku esaki”, segun dr Hulshof a bisa kende a gradesí henter e tim di vakunashon pa a hasi un bon trabou. E tim a haña diferente kòmplimènt pa e proseso efektivo i amikal di vakunashon.

E  grado haltu di kobertura ta nifiká ku e reapertura parsial di Saba pa dia 1e di mei por kontinuá. Pa dia 1e di mei personanan ku ya a vakuná no tin mester di bai karentena mas na momentu ku nan drenta e isla miéntras ku esnan ku no a vakuná tin di bai karentena pa un periodo mas kòrtiku.

Manera a spera e di dos vakuna a kousa ku mas hende a eksperensiá e efektonan sekundario ku a dura 1 pa 2 dia. E efektonan sekundario ta nifiká ku e sistema imunológiko ta funshonando. Dr Hulshof a bisa di ta kontentu ku e efektonan sekundario no a pone ku e hendenan no a bai tuma nan di dos shòt di e vakuna ya ku vakunashon kompleto ta un piesa importante pa lucha kontra e pandemia di COVID-19.