THE BOTTOM.- Djaluna último den oranan di mainta, Saba a terminá di vakuna su abitantenan den e promé ronda di vakuna. Awor nan ta prepará pa e di dos “shot” di vakuna. Den un siman di tempu, for di 22 di febrüari ku nan a start ku e vakunashon, dia 1e di mart nan a sera esaki.

E kantidat di hende ku a vakuná ta un total di 1,328. Esaki ta representá 85% di e poblashon di adulto, i riba 70% di e poblashon total di Saba.

Mayoria di e hendenan adulto na Saba, alrededor di 1500 a vakuná na Eugenius Johnson Center den e un siman.

Dia 19 di febrüari, Saba a risibí 1500 vakuna di marka Moderna, kual tabata sufisiente pa vakuna henter e poblashon adulto di Saba.

Pues na e momentu aki Saba tin e porsentahe di mas haltu di  hende vakuná den Reino Hulandes i internashonalmente tambe.

“Nos tin e kobertura di mas haltu na mundu”, Dr. Koen Hulshof, hefe di e departamento di salubridat di Saba a bisa.

Vários faktor a kontribuí na éksito di e kantidat di hende na Saba ku a vakuná, e kordinadó di vakunashon Tedisha Gordon a splika. El a bisa ku e struktura i tambe e organisashon di e vakuna a yuda masha hopi mes. E tim di vakuna tabata hopi amabel i tambe efisiente. Ademas Saba a start ku dunamentu di informashon na e komunidat tokante seguridat di e vakuna i e  proseso di vakunashon. Mas di 30 seshon di informashon a tuma lugá na skolnan, misanan, organisashonnan i kompanianan privá.

E vibrashon positivo a kontribuí ku hopi sabano a disidí pa tuma e vakuna, pasobra nan ke bai na normalidat bèk. A usa medianan sosial ekstensivamente, miéntras tabatin transporte grátis pa lugá di vakunashon, kual tabata un faktor masha positivo.

Den e siguiente simannan ta spera ku Saba lo risibí e di dos vakuna di Moderna for di Hulanda. Esaki lo tuma lugá fin di mart próksimo.

Na e isla di St. Eustatius tambe ta vakuná abitantenan i ta kasi yega e total ku Statia ke logra pa vakuna. Na Statia tin 800 vakuna disponibel den e promé ronda. Te ainda 730 hende a registrá pa vakuná. Nan no ta vakuná tur dia na Statia. Te ku siman pasá, 681 hende a tuma e promé porshon dje vakuna Moderna. E di dos ronda di vakuna ta programá pa tuma lugá 22 di mart. Te ainda 681 hende a tuma e vakuna i tin 68 mas pa tuma. Gobièrnu dje isla ta focus pa vakuná alrededor di 800 hende. Asina ta kla, Statia lo pidi Hulanda pa mas vakuna p’e di dos ronda di vakunashon tuma lugá. Sinembargo gobièrnu a tuma nota ku hopi hendenan riba 60+ ku ta vulnerabel ainda no a keda vakuna. Ademas gobièrnu lo ke bin ku medida, ku residentenan di Statia ku a vakuna por regresá e isla sin ku nan mester bai karentena.

Tambe ta spera ku den e di dos ronda di vakuna, ku por vakuná 1800 hende.