Un eksposishon pa selebrá bida

WILLEMSTAD.- Landhuis Bloemhof ku sumo plaser ta habri su sala pa presentá for di 19 di sèptèmber un eksposishon ku pinturanan di fèrf di oleo di Saida Hernandez. Temp’i mi ten - selebrando bida, ta título di e eksposishon. E apertura a tuma lugá 5’or di atardi, i sra Eveline Wong – de Haseth a hiba palabra.
Temp’i mi ten - selebrando bida
Temp’i mi ten - selebrando bida ta konsistí di un kolekshon di kuadro den kua e artista ta konta ku su pinsel, storianan di un tempu ku ta sigui biba den rekuerdo di nos pueblo. Hasiendo esaki e ta duna espasio na esnan ku a konosé e tempu akí pa rebibá momentunan di nostalgia i konta nan eksperensianan na esnan mas hóben. Pa medio di tur e detayenan ku e sa di kapta ku masha presishon manera e.o. shanguilié, stul di zoya i di Thonet, mesita di kantu, paña di mesa di hak, vitrashi, balkon ku bentana di yalusí, hanchinan i fachada di kas. Saida su kuadronan ta dokumentá i traspasá nos herensia na un manera direkto i sinsero. Su kuadronan, semper fini akabá, ku kolónan bibu i vibrante ta karakterisá e alegria i amor di e artista pa konta di bida na Kòrsou.

Saida Hernandez (Kòrsou, 1935)
“Mi deseo pa pinta a lanta na momentu ku mi tabata buska un pintura pa nos apartamento na New York, tempu nos tabata biba ei den añanan 50.  Komo mi no por a haña algu ku tabata kuadra ku nos interior, mi a disidí di purba mi mes pinta algu.” Saida su promé obra tabata di e sede di Partido Demokrat den Breedestraat, Otrobanda. Despues ku el a bin biba bèk Kòrsou el a kuminsá pinta interior di kas, prinsipalmente den área di Otrobanda kaminda el a nase. Saida a partisipá den vários eksposishon di grupo i Temp’i mi ten - selebrando bida lo ta e di seis eksposishon solo di Saida Hernandez. Na aña 1981 e ta tin su promé eksposishon den Museo di Kòrsou i na 2005 atrobe. Esaki ta su di 4 eksposishon na Landhuis Bloemhof.  Saida ta konosí komo un di e promé lokutornan femenino di TeleCuraçao i a gosa tremendo éksito ku diferente programa na televishon, manera entre otro Kushina di Oro i pa su bukinan di reseta.

Klousura
Pa selebrá Saida su kumpleaño i tambe su trayektoria komo pintor, tin publikashon di un buki den tapara ku potrèt di vários obra ku e la pinta atraves di tempu, kada un kompañá pa un haiku. Mas informashon tokante e buki lo keda anunsiá despues.

E eksposishon ‘Temp’i mi ten - selebrando bida lo ta habrí for di 19 di sèptèmber te ku 31 di òktober 2020 na Landhuis Bloemhof. Landhuis Bloemhof ta situá riba Santa Rosaweg 6, pegá ku café 'Tap Maar In' i nos ta habrí di djamars te ku djasabra entre 9 or i 2 or di mèrdia, nònstòp. info@bloemhof.cw, www.bloemhof.cw, like nos riba Facebook.  Landhuis Bloemhof ta aksesibel pa hende den ròlstul. Reglanan di higiena i di distansia sosial na vigor, lo keda apliká.