WILLEMSTAD.- Djego Real, huntu ku Izaline Calister, ke motivá e diáspora antiano biba riba nos islanan i na Hulanda, pa saka man i yuda su próhimo, den un momentu di Yelele! E kantika infeksioso ta papia di e alegria i satisfakshon ku trabou boluntario por duna bu. Ku Yelele, e proyekto ‘Samen Ouder Worden’ ke kòrda nos ku nos bario mester di nos, i ke motivá bo pa kaptura bo momento di akshon – yama e momentu Yelele.

Riendy ‘Ray Bas aka Djego’ Holder i Shari van den Hout a splika di e proyekto i e kantika Yelele  produsí i skibi pa ‘Ray Bas aka Djego’ i Izaline Calister ku ta bai kompaña ku un videoclip ku a keda dirigí pa Pathos Studios.

Samen Ouder Worden

Shari van den Hout a splika ku Samen Ouder Worden ta un proyekto ku tin komo meta pa nos hendenan grandi no wòrdu isolá. Pa kombatí soledat di nos grandinan. E proyekto aki ta un inisiativa di ministerio di salubridat públiko ku 11 organisashon di boluntario. E manera pa yuda nos grandinan ta pa konektá generashonnan yòn i grandi dor di trabou di boluntario. Ya nan tin 2 aña bezig ku e problema ku nos hende grandinan ta bira mas isolá, ta ya kaba di basta aña.  Yelele ta un sentimentu. Shari a bisa di a aserká Ray Bass ku e pensamentu kon pa haña nos hendenan, i e manera ta pa medio di un kantika. Asina a bin den kontakto ku Ray pa duna e mensahe di Samen Ouder Worden.

Ray Bass a konta nos ku e ku Shari a topa otro via stichting Ocan. Nan tabata trahando un video pa konsientisá nos hendenan riba e lei di donor esta si bo fayesé i bo no tuma un desishon pa duna bo órganonan, esaki ta bai outomátikamente. Einan Shari a aserká Ray ku e petishon pa duna un man pa produsí e kantika di konsientisashon pa Samen Ouder Worden. E kantika sòru pa e grandi konektá ku esun mas yòn i pa atraé boluntario pa hasi e trabou. Ray a sintié toka for di e momentu di e kombersashon ku Shari van den Hout i mesora el a bai  di akuerdo pa hasié. Ray tabatin man liber pa e por yega na e kantika i e palabra Yelele ta e promé kos ku a bin den su kabes. Ku kada inspirashon Ray ta manda esaki pa Shari te ora Ray a yega riba e persona di Izaline Calister komo esun pa kant’é.  Pa Ray ta Izaline so tin e stèm di Kassav pa kanta e kantika. Pero Izaline mes tambe asina el a tende di e proyekto a bisa si mesora. E Yelele riba su mes no ta nifiká praktikamente nada pero den e kantika el a haña un sentimentu.

Toka kurason

Shari a bisa ku nan a lansa e kantika siman pas i kada bia ku nan tin oportunidat di konta, nan ta haña reakshon prinsipalmente di hóbennan ku ke sa unda nan por inskribí. Ora nan tabata graba e videoclip kaba, e hóbennan ta reakshoná i nan ke dediká maske ta un ora pa luna bishitando un grandi. Shari ta mira ku e kantika ta asina bon ku e mensahe ta drenta i drenta kurason tambe.

Nos hendenan di Karibe ta hasi trabou boluntario kasi tur dia pero di forma informal. Ta pasa kumpra kos na supermerkado i hiba pa un tanta grandi, un mama ku mester traha ta wak e yu pe, tur ta trabou boluntario pero informá. Na Hulanda tur trabou boluntario ta formalisá. I p’esei nan ke mustra ku nos hendenan tambe ta kontribuí na e pais ei pasobra trabou boluntario ta semènt di un komunidat i antianonan tambe ta partisipá di e mesun manera. Shari su deseo ta pa na Antia tambe tin Yelele pero no pa nan di Hulanda bin bisa ta kon.

Sufri den silensio 

Bira grandi ta un privilegio ku nos tur lo ke eksperensiá. Lamentablemente, hopi di nos grandinan ta kayendo den isolashon pasó nan no tin akseso na e rekursonan sosial disponibel. E grandinan aki ta sufri den silensio i ta kai den isolashon, espesialmente esnan bibá na Hulanda. P’esei fundashon NOV – Nederlandse Organisaties Vrijwilligerswerk – a tuma e inisiativa pa promové e konekshon entre generashonnan pa medio di trabou boluntario unda e nesesidat di e grandi ta para sentral.

E momentu ‘Yelele’

E reto ta pa determiná kon pa motivá e hóben antiano pa hasi trabou boluntario i pa motivá e grandi pa kompartí su sabiduria i konosementu ku e generashon benidero. Ku e kantika ‘Yelele’ e gritu pa akshon a keda publiká ku un kampaña ku ta aktivo entre 15 pa 30 di novèmber. Djego i Izaline ke motivá nos komunidat pa kaptura nan propio momentu “Yelele’, pero mirando e ristrinshon di COVID -19, nos mester kuida espesialmente nos grandinan i p’esei ta opta pa hasi un gritu di akshon mas moderá. P’esei nan ta invitá un i tur pa usa nan telefòn i graba 1 minüt di e mihó interpretashon di e kantika ‘Yelele’ i ‘tag’ e Facebook/YeleleNederland i pone e ‘hashtag #Yelele i #Yelelemoment. Lo skohe e mihó interpretashon di “Yelele’, unda lo saka dos ganadó ku por gana vários premio atraktivo. Tur clip lo keda kompartí riba e páginanan di Yelele riba Facebook i Instagram. Lo saka e ganadó durante e promé siman di desèmber.

Aktivá den bo bario

Pa mas informashon kon pa ehekutá trabou boluntario den bo bario, bishita e wèpsait di www.samenouderworden.nl pa mas informashon i manda un WhatsApp pa e tim di Den Haag –Yurani i Shari – na +31-619788541. Sigui Ray Bass na  www.instagram.com/mrraybass i Djego: www.instagram.com/djegotami Por sigui Izaline Calister riba su  instagram.com/izalinecalisterofficial