WILLEMSTAD.-Ministerio Publiko, awe 2 di mart faltando nèt 17 dia pa elekshon pa Parlamento, a saka un atvertensia riba e prohibishon pa saka potrèt di karchi di vota. Último añanan a bira konosí ku mas i mas hende ta saka potrèt di loke nan a vota pa diferente motibu.

OM ta mustra ku e diferente partidonan polítiko ta hibando kampaña pa logra mas tantu voto pa di e forma ei haña representashon den Parlamento. Elekshon liber, sekreto i honesto ta base di un estado di derecho demokrátiko. E importansia ta ankrá den Areglo di Estado i areglonan internashonal. Un votadó tin e derechi pa emití su voto sin ningun influensia i pa tene su desishon pa su mes. A base di e Kódigo Penal, kompra òf benta di voto por wòrdu kastigá ku un kastigu di prisòn di máksimo 2 aña. Ora ta trata di froude ku voto, hopi biaha un potrèt komo prueba di bo eskoho ta nesesario pa por kobra plaka. Pa e motibu aki den e Reglamentu di votashon (Kiesreglement) artíkulo 68a ta stipulá ku ta prohibí pa saka potrèt durante votashon den e lokal di vota. Ministerio Públiko lo vigilá ku e elekshon lo ta unu liber i hustu.