...Awe ta un dia grandi pa Kòrsou. Awe pueblo tin e derechi di vota i asina disidí ken ta esnan ku tin di bai dirigí nos pais.

Ta un derechi ku no tur pais na mundu tin i p’esei nos ku tine, laga nos hasi bon uso di dje. Sali bo kas tempran i bai VOTA.

I loke tambe ta masha importante, respetá e desishon di e bos di pueblo. Respetá e koalishon ku forma pa e por goberná nos pais realmente.

Kòrsou mester tin un gobernashon real atrobe. Pasobra nos tin hopi problema. Ekonomia ta stanka, Hospital nobo den konstrukshon ku kada bes mas gastu ta bin aserka, kosto di bida ku ta subi poko poko pero sigur miéntras ku trahadónan ta lanta tur dia ku tenshon si nan lo tin trabou mayan òf no.

E situashon aki nos pais no por sigui pasa aden. Nos mester bisa ta basta, vota pa esun ku nos ta kere ku por hiba Kòrsou dilanti, ku por duna un porvenir sigur na su pueblo pero mas ku tur kos sali kas i bai vota.

Laga e dia aki kana trankil i kòrda ku den tur nos aktonan, e úniko víktima finalmente ta Kòrsou.