CMC: Trahadónan mal kansa no por mas

WILLEMSTAD.- Minister Dorothy Pietersz-Janga enkargá ku Salubridat, Medio Ambiente i Naturalesa a presentá un situashon sumamente serio pa loke ta trata e situashon finansiero den salubridat i banda di esei personal di hospital CMC ku ta mal kansa te ku mester kuminsá pensa pa manda hende afó.

Den su splikashon e minister a informa ku tur aña mas ku 550 mion ta bai den kuido. Di e montante aki 200 mion ta bai pa kuido den hospital CMC, 20-25 mion ta bai pa kuido den Advent i e sobrá ta bai den diferente otro instansianan di kuido. Tin 50 – 60 instituto den kuido ku ta den problema finansiero, asina e minister a deklará.

E minister a bisa mas aleu ku hopi instituto a aserka ministerio di GMN rogando pa yudansa, sin yudansa nan no ta logra yega fin di e aña aki. SVB ta kobra prima serka esnan ku ta traha, pero e kantidat di hende ku ta paga prima ta bahando. Komo un kondishon pa haña mas yudansa finansiero di Ulanda a pone kondishon ku mester baha gastu den SVB i tambe den hospital.

Hospital CMC a entrega su petishon na gobièrnu pa fondo pa e servisionan ku nan ta duna. Pa 2019 CMC a pidi  199.7 mion pero SVB a honra 182. Pa 2021 CMC a pidi 206 mion pero SVB a honra 184.5 mion. Pues semper SVB ta honra ménos.

E siman aki CMC den karta na e minister ta pidi yudansa finansiero adishonal pasobra nan no por mas. E sèn no ta yega te fin di aña. Tur luna CMC tin défisit di 5 mion florin. E di dos bòm ta momentu ku CMC a informa ku mester kuminsá pensa pa manda hende afó atrobe pasobra su personal ta asina kansa ku nan no por mas. Esei ta subi tur gastunan atrobe. Tur detaye den edishon di EXTRA.