SRI: 500 mion dòler pa konstruí resort di 500 kamber na Saint Vincent

WILLEMSTAD/KINGSTON.-Sandals Resorts International ta selebrando e echo ku seis(6) di su resortnan a haña un rekonosementu den e Tpo-40 di Caribbean Resorts di Condé Nast Readers Choice Awards. Esaki ta un di e distinshonnan di mas prestigioso ku un resort por risibí den e industria di turismo. Sandals Royal Curaçao tambe ta entre e seis resortnan di Sandals ku a haña e rekonosementu prestigioso aki.

Adam Stewart, presidente ehekutivo di Sandals Resorts International den un komentario riba retnan sosial ta duna di konosé ku ‘e loke ta hasi e premio aki asina spesial ta e echo ku ta wéspetnan esta hendenan ku a eksperensia e servisio bon i kaluroso ku ta kompartí esaki ku otronan.” Esaki ta danki na e trahadónan ku ta hasi un tremendo trabou den tur Sandals.

E resortnan di Sandals ku a risibí premio ta Sandals Saint Vincent & The Grenadines, Sandals Dunn’s River, Sandals Royal Curaçao, Sandals South Coast, Sandals Regency La Toc i Sandals Royal Plantation

500 mion dòler

E siman aki presidente ehekutivo di Sandals Resorts International (SRI) Adam Stewart a partisipá ku SRI a komprometé 500 mion dòler (U$) pa un proyekto hotelero di 500 kamber na Saint Vincent and the Grenadines. Esaki lo bira un Beaches Resort. Beaches ta e kadena di Sandals ku ta risibí famia kompletu kontrali na Sandals ku ta solamente pa adulto. Adam Stewart ta bisa ku e momentu ku a firma e akuerdo ku promé minister di e isla Dr. Ralph Gonsalves tabata momentunan sumamente impreshonante ya ku e ta kòrda ku e proyekto aki ta unu ku su tata, Butch q.e.p.d., a kana kuné na mente pa hopi aña. E resort nobo ta krea 2000 kupo di trabou nobo.

Stewart a sigui bisa ku na momentu ku el a skucha e promé minister papia di Sandals Resorts International esei a yen’é ku orguyo. Promé minister Gonsalves a splika ku SRI tin un ròl holístiko den e desaroyo di Saint Vincent and the Grenadines. Esaki ta prueba ku na momentu ku vishon i invershon kana huntu esei ta pèrkurá pa desaroyo duradero i grandi. Saint Vincent and the Grenadines ta un isla ku poblashon di alrededor di 100.000 abitante.