WILLEMSTAD.- Roald Smeets, direktor di Santa Barbara Beach & Golf Resort, ayera na okashon di firmamentu di e akuerdo di benta di Santa Barbara Resort Kòrsou ku Sandals, a bisa ku atraves di añanan tabatin hopi redu rondó di Santa Babara Resort. Algun di nan prèt, otronan interesante, pero tin algun ku ta preokupante. Pero algun siman tras di lomba tabatin un rumor ku defakto tabata hopi i interesante, esta ku ta bai bende Santa Barbara, nan a pèrdè fe den Kòrsou i nan lo bai for di aki.

Pero esaki simplemente no ta bèrdat, Smeets a bisa, semper nan tabatin konfiansa den Kòrsou i esei lo keda asina tambe.

Smeets a splika ku den nan sondeo pa buska un operador pa e hotèl, nan a disidí di aserka Sandals i despues di a sinta ku nan na mesa, nan a sera konosí ku e forma kon Sandals ta manehá nan hotèlnan i alabes invertíٕ.

Ta konosí ku mayoria kadena hotelero ta simplemente  hür un hotèl i maneh’é i no ta invertí den e vienes inmóbil, pues e kadena hoteleronan aki no tin niun kompromiso ku e pais.

Den e kaso di Sandals t’asina ku nan ta manehá, invertí i bira doño di nan edifisio. P’esei Sandals ta kumpra e hotèl, no pa motibu ku Smeets tabata ke a bende, pero simplemente esaki ta e forma kon Sandals ta manehá.

Esaki ta un aspekto positivo na opinion di Smeets, pa motibu ku kumprando e hotèl, nan tin interes den e propiedat aki na Kòrsou i lo aportá pa Kòrsou.

Smeets ta trese dilanti ku esaki ta un oportunidat úniko pa atraé un operadó di hotèl mundialmente rekonosé, propietario i invershonista manera Sandals Resorts ku sin duda lo trese un bendishon sin presedente pa e industria di turismo di Kòrsou i e ekonomia lokal.

Nan posishon komo operadó i alabes propietario di hotèl ta duna nan e abilidat pa atraé buelonan regular di kompanianan di aviashon merikano, loke ta distinguí nan mesora for di otro gruponan hotelero.”

Smeets ta konsiderá “nan plannan impreshonante pa e lokalidat i nan dedikashon pa traha un profil di Kòrsou komo un destinashon turístiko mundial, partikularmente fasinante. Nan invershonnan pa futuro den e komunidat lo supla bida nobo den e merkado di turismo, lo garantisá e porvenir di  sentenáres di famia i lo duna benefisio na kada individuo riba e isla aki, revitalisando e ekonomia lokal.

Kòrsou tin un futuro briante su dilanti danki na e akuerdo nobo i emoshonante aki ku realmente lo posishoná Kòrsou riba tarima mundial.”