WILLEMSTAD.- Sandals Resorts International (SRI) a habri e posibilidat pa hasi reservashon pa su di 16 resort, esun di mas mahestuoso di e kadena, anto esaki ta e resort na Kòrsou ku lo karga e nòmber Sandals Royal Curaçao. SRI ta ofresé deskuento di te $ 1000. Esaki ta bira e promé resort di Sandals aki na Kòrsou.

Situá riba 44 hèktar di e tereno privá di Santa Barbara, un tereno protehá di 3000 hèktar, Sandals Royal Curaçao di forma outéntiko lo meskla maravianan natural ku desierto, oséano, serunan i kosta ku un eksperensia i ambiente di un resort.

Aki parehanan lo por deskubrí bunitesa i diversidat geográfiko di Kòrsou, ku ta konosí pa su parti aventurero, playanan puru i original, kuebanan di kalki i un sentro di siudat Willemstad vibrante, rekonosé pa Unesco komo herensia kultural. Tur esaki lo ta den un ambiente di luho di kalidat mas haltu manera Sandals Resorts ta konosí pe.

Sandals Royal Curaçao ta pendiente pa habri 14 di aprel 2022. E resort ta situá apénas 24 km for di e aeropuerto di Kòrsou. Su posishon ku direkshon pa wèst ta pone ku por kapta e bahadanan di solo di mas espektakular ku Karibe por ofresé i asina ta brinda su wéspetnan un trit pa bista. E resort ta ofresé 351 kamber luhoso i suites den 24 kategoria i asina Sandals Royal Curaçao lo ofresé mas opshon ‘all inclusive’ di luho ku nunka a keda ofresé den pasado. Esaki ta inkluí dos kategoria nobo di suite ku ta “Awa Seaside Butler Bungalows” i tambe “ Kurason Island Poolside Butler Bungalows”. Nan ta ofresé ‘tranquility soaking tubs’ ku ta badkuip pa e trankilidat máksimo, tambe pisina privá, servisio di ‘butler’ ademas e wéspet spesial lo tin na su disposishon outonan Mini Cooper super deportivo pa e por eksplorá e isla.

Un lugá pa deskubrí i eksplorá

Adam Stewart presidente ehekutivo di SRI ta splika ku e grandura enorme di e área privá unda Sandals Royal Curaçao ta ubiká ta brinda e wéspetnan e oportunidat di aventura fabuloso.

Na Sandals Royal Curaçao e wéspetnan por kana, kore baiskel i asta pidi pa un makutu di piknik pa un dia ku nan ke bai eksplorá. Romanse puru, anto e wéspet por sigui riba e ruta aki pafó di e tereno tambe den e destinashon di klase mundial ku tremendo restorantnan, un pueblo fasinante, arte di kalidat i bishitantenan di rònt mundu. ‘Nos a invertí 72 mion dòler adishonal den ampliashon i otro fasilidatnan pa kompletá e proseso di “Sandalization” di e propiedat, ku ya kaba ta asina bunita.

Sandals Royal Curaçao ta bira e promé resort di e kadena ku e promé ‘Awa infinity pool’ ku bista riba laman i e serunan bunita i tambe e promé pa ofresé e restorant i bar flotante konstruí riba un barku

ulandes outéntiko The Duchess.

Lo tin 9 restorant gourmet di 5 strea di kua 8 ta nobo i eksklusivo pa Sandals Royal Curaçao. E wéspetnan lo por saboriá kushina mundial inkluyendo un bar outéntiko ku keshi i biña ulandes. Tapas spañó, kuminda asiátiko, restorantnan riba playa i kuminda estilo trùk di pan tradishonal di Kòrsou.

Gary Sadler ku ta e vise presidente ehekutivo di Global Sales & Industry Relatios for Unique Vacations Inc., esaki ta un kompania afiliá na Sandals Resorts, wéspetnan ku hasi nan reservashon di awor te 2 di novèmber 2021 lo risibí un deskuento di apertura di $ 1000. Wéspetnan di Sandals Select Rewards lo partisipá den e deskuento grandi aki i lo por skohe entre tour riba e isla na balor di $200 òf Spa credit tambe na balor di $ 200 òf tambe Padi Discover Scuba Diving Experience pa dos persona ora reservá un estadia di 6 dia òf mas te 5 di ougùstùs 2021. Sadler: ‘Nos ta kontentu di por pone e resort remarkabel aki disponibel pa wéspetnan por sera konosí ku Kòrsou i asina sera konosí ku e bunitesa, e kalor humano di su pueblo i e energia sin límite di e destinashon aki. Nos ta sigur ku nos partnernan lo stima e hotèl aki”.